حەوت کەس بە تۆمەتی ساختەکاری لە موڵکێکی دەوڵەتدا بە 15 ساڵ زیندانی حوکم دەدرێن

ئاڤا نیوز

دەسەڵاتی دادوەریی عێراق ڕایدەگەیێنێت، حوکمی 15 ساڵ زیندانی بەسەر حەوت کەسدا سەپێندراوە، ئەوان دانیان بەوە داناوە ساختەکارییان لە موڵکێکی دەوڵەتدا کردووە.

وێنە گەورەکە: بەپێی ڕێکخراوی شەفافیەتی نێودەوڵەتی، عێراق یەکێکە لە گەندەڵترین وڵات لە جیهاندا، لە دوای ساڵی 2003ـەوە گەندەڵی لەو وڵاتە بووەتە دیاردە و سەرجەم دامەزراوەکانی دەوڵەتی گرتووەتەوە و تەنانەت بە ملیارەها دۆلار بە گەندەڵی و نایاسایی براونەتە دەرەوەی وڵات.

ڕاگەیێنراوی فەرمی: بەگوێرەی ڕاگەیێنراوی دەسەڵاتی دادوەری، "دادگای ناوەندیی تاوانەکان، دوو حوکمی بەندکردنی بۆ ماوەی 10 ساڵ و 15 ساڵ بەسەر حەوت تاوانباردا دەرکردووە بە تۆمەتی دەستکاریکردن و ساختەکاری لە دۆسیەی موڵکێکی گەڕاوە بۆ دەوڵەت."

لەهەمان کاتدا: بەگوێرەی ڕاگەیێنراوەکە، تاوانبارەکان دەستیان وەرداوەتە دۆسیەی موڵکێک کە هی وەزارەتی دارایی بووە لە ناوچەی عامرییە لە بەغدا، فرۆشتوویانە و بە ناوی کەسانی دیکەوە تۆماریان کردووە لە بەرامبەر بڕێک پارەدا.

زانیاریی زیاتر: دەزگا ئەمنییەکان دەستیان بەسەر بەڵگەنامەی موڵکایەتی و 87 مۆری ساختەدا گرتووە کە هی دامودەزگا حکومییەکانن، ڕەگەزنامە، ناسنامەی باری شارستانی، کارتی نیشتەجێبوون، ئامێری کۆپی و گرێبەستی کڕین و فرۆشتندا گرتووە کە لای تاوانبارەکان بووە.