نێردەی ترەمپ: پێشکەوتنی گەورە بۆ غەززە لە ئارادایە

ئاڤا نیوز

هەر چەندە شەڕی غەززە لە دووەم ساڵی نزیکدەبێتەوە، بەڵام هەوڵەکان بۆ ڕاگرتنی شەڕەکە هەر بەردەوامن، لەبارەی ئەمەشەوە نێردەی تایبەتی ئەمریکا بۆ ڕۆژهەڵاتی ناوەڕاست ئاشکرای دەکات، لە ڕۆژانی داهاتوودا چاوەڕوانی پێشکەوتنێکی گەورەین لەسەر پرسی غەززە.

چیڕۆکی سەرەکی: ترەمپ لە پەراوێزی کۆبوونەوەکانی کۆمەڵەی گشتیی نەتەوەیەکگرتووەکان لەگەڵ سەرکردەکانی چەندین وڵات کۆبوویەوە لەوانەش قەتەر، ئیمارات، ئوردن، تورکیا پرسی کۆتاییهێنان بە شەڕی غەززە و ئازادکردنی بارمتەکانیان تاتوێی کرد.

لێدوانی فەرمی: ستیڤ ویتکۆف، نێردەی تایبەتی دۆناڵد ترەمپ، سەرۆکی ئەمریکا بۆ کاروباری ڕۆژهەڵاتی ناوەڕاست ڕایگەیاند، ترەمپ لەمیانەی کۆبوونەوەی لەگەڵ سەرکردەکانی وڵاتانی عەرەبی و ئیسلامی لە پەراوێزی کۆبوونەوەکانی کۆمەڵەی گشتیی نەتەوەیەکگرتووەکان، چەند بیرۆکەیەکی و پلانی خستووەتەڕوو پلانەکەش بە ناوی 'پلانی 21 خاڵیی ترەمپ' بۆ ئاشتی لە ڕۆژهەڵاتی ناوەڕاست و غەززە پێشکەش کردووە.

زانیاریی بەدەستهاتوو: ناوبراو لەبارەی پلانەکە گەشبینی خۆی دەربڕی وتیشی، ''هیوادارین و تەنانەت دەتوانم بڵێم دڵنیاشین، لە ڕۆژانی داهاتوودا بتوانین جۆرێک لە پێشکەوتنی گەورە ڕابگەیەنین.''