ئاڤای خەڵک؛ قوتابیانی گوندی بێریات لە هەولێر بێ بینایەی قوتابخانە ساڵی نوێی خوێندن دەستپێدەکەن

ئاڤا نیوز

دانیشتووانی گوندی بێریات لە ناحیەی شەمامک، کە ژمارەیان زیاتر لە 100 ماڵە، گرفتی نەبوونی بینای قوتابخانەیان هەیە، بە گوتەی دانیشتووان ساڵانە خانوو بە کرێ دەگیرێت بۆ ئەوەی وەک قوتابخانە بەکاربهێنرێت.

زانیاریی بەدەستهاتوو: ئەسکەندەر عەلی، یەکێک لە دانیشتووانی گوندەکە، بە ئاڤای ڕاگەیاندووە، "هەموو ساڵێک لەگەڵ دەستپێکردنەوەی پڕۆسەی خوێندن تووشی ئەم کێشەیە دەبین، قوتابییەکان سەرەتای دەوامی قوتابخانەیان دەفەوتێت."  ساڵانی ڕابردوو وەزارەتی پەروەردە خانووی بە کرێ دەگرت، بەڵام ئەمساڵ خاوەنی خانووەکە ئامادە نییە خانووەکەی بە کرێ بدات. "لە ئێستادا بێ قوتابخانەین و داوا دەکەین بە خێرایی چارەسەرێکمان بۆ بدۆزرێتەوە."

لێدوانی فەرمی: لوقمان سدیق، بەڕێوەبەری گشتیی پەروەردەی هەولێر، بە ئاڤای ڕاگەیاند، بەدواداچوونیان بۆ کێشەی ئەم گوندە کردووە. گوتیشی، "ئێمە ڕێککەوتنمان لەگەڵ خاوەنی ئەو خانووە هەبووە کە بە کرێمان گرتبوو بۆ قوتابخانە، دەبوو تا مانگی 12ـی ئەمساڵ دەوامی لێ بکرابا." 

 "ئەو کەسە بەبێ ئاگاداری ئێمە خانووەکەی بە کرێ داوەتە کەسێکی تر، ئیجرائاتی یاسایی لە بەرامبەریدا دەگرینەبەر و لە سبەینێوە خانوویەکی دیکە دابین دەکەین و دەیکەین بە قوتابخانە."لوقمان سدیق ئەوەشی وت.