وەزیری دەرەوەی عێراق: ئەگەر هەیە ئەم هەفتەیە هەناردەکردنی نەوتی کوردستان دەستپێبکاتەوە

ئاڤا نیوز

لەبارەی دووبارە هەناردەکردنەوەی نەوتی هەرێمی کوردستان، وەزیری دەرەوەی عێراق ئاشکرای دەکات، ئەگەر هەیە لەم هەفتەیەدا دەستپێبکاتەوە.

چیرۆکی سەرەکی: ڕێککەوتنی سێقۆڵی نێوان وەزارەتی سامانە سرووشتییەکان و کۆمپانیای نەوتی باکوور و کۆمپانیاکانی بەرهەمهێنانی نەوت واژۆکرا، بە پێی ڕێککەوتنەکە دەبێت هەناردەی نەوتی کوردستان دەستپێبکاتەوە، کە مەرجێکی سەرەکی نێوان هەولێر و بەغدایە بۆ ڕێککەوتن لەسەر مووچە.

لێدوانی فەرمی: فوئاد حوسێن، وەزیری دەرەوەی عێراق ڕۆژی چوارشەممە بۆ بلومبێرگ ئاشکرای کرد،"بە ئەگەرێکی زۆرەوە لەم هەفتەیەدا هەناردەکردنی نەوت دەست پێدەکاتەوە، بەغداش لەگەڵ تورکیا دانوستانەکانی دەستپێکردووە و بۆ ڕێککەوتنی نوێ، چونکە ئەو ڕێککەوتنەی ئێستا لەنێوان هەردوولا هەیە لە ساڵی 2026 کۆتایی دێت.

زانیاریی زیاتر: فوئاد حوسێن لەبارەی زیانەکانی ڕاگرتنی هەناردەکانی نەوت ئاماژەی بەوەدا، عێراق بەهۆی ڕاگرتنی هەناردەی نەوت لە هەرێمی کوردستان، لەنێوان 22 بۆ 25 ملیار دۆلار زیانی بەرکەوتووە''.

لەلایەکی دیکەوە: گوتەبێژی حکومەتی هەرێمی کوردستان دوێنی چوارشەممە دووپاتیکردەوە لە 48 کاتژمێری داهاتوو هەناردەکردنەوەی نەوتی هەرێمی کوردستان دەستپێدەکاتەوە

باکگراوند: بە بڕیاری دادگای ناوبژیوانیی پاریس لە 2023-03-25، هەناردەکردنی نەوتی هەرێمی کوردستان بۆ بازاڕەکانی جیهان ڕاگیرا.