ئومێد خۆشناو: كۆڕنیشی هەولێر دەكرێت بە شوێنێكی گەشتیاری و ژینگەیی

ئاڤا نیوز

کۆڕنیشی هەولێر لەڕێگەی سێ دەریاچە و چەند پۆندێکەوە دەکرێتە پرۆژەیەکی گرنگی گەشتیاری و ژینگەیی سەرنجڕاكێش و لە زێی گەورەوە ئاوی بۆ ڕادەكێشرێت.

چیرۆکی سەرەکی: ئەمڕۆ پێنجشەممە 25-9-2025، پارێزگاری هەولێر بە ئامادەبوونی جێگری پارێزگار و سەرۆکی شارەوانی و بەڕێوەبەری گشتی شارەوانییەكان و بەڕێوەبەرانی نووسینگەی پارێزگار، ئاودێری، ئاوەڕۆ، قەیرانەكان، پەیوەندییەكان، لە دیوانی پارێزگا، کۆبوونەوەیەکی تایبەتی لەگەڵ كۆمپانیای "كەی وەن" و چەند ئەندازیارێكی دیکەی وڵاتی ئیتاڵیا، سەبارەت بە پڕۆژەی دیزاینکردن و پەرەپێدانی کەناڵی کۆڕنیشی هەولێر و پڕئاوكردنی وەك پڕۆژەیەكی گرنگی گەشتیاری و ژینگەیی ئەنجامدا.

لێدوانی فەرمی: ئومێد خۆشناو، پارێزگاری هەولێر بە ئاڤا میدیای ڕاگەیاند، سەرەڕای قەیرانەکان و  قۆناغی سەختی دارایی لە ساڵانی ڕابردوودا، بەڵام بە پاڵپشتیی سەرۆکوەزیران مەسرور بارزانی توانراوە ئاوەدانی و خزمەتگوزاریی زۆر بە شاری هەولێر و هاوڵاتییان بگات.

ئومێد خۆشناو ڕاشیگەیاند، كۆڕنیشی هەولێر لە داهاتوویەکی نزیکدا دەکرێت بە پڕۆژەیەكی گرنگی گەشتیاری و ژینگەیی  سەرنجڕاكێش و لە زێی گەورەوە ئاوی بۆ ڕادەكێشرێت. هەروەها لەڕێگەی دروستكردنی سێ دەریاچە و چەند پۆندێكەوە دوای ئاو كۆكردنەوە تێیاندا، بە بەردەوامی ئاو دەگەیێنرێت بە كۆڕنیشەکە.

پارێزگاری هەولێر جەختی لەوە كردەوە، پێویستە پڕۆژەكە بە شێوەیەك بێت، لە ڕووی ژینگەیی و گەشتیارییەوە  سوودی زۆر بە ناوچەكە و دانیشتووانی هەولێر بگەێنێت و سرووشت بگەڕێتەوە بۆ ناو شار و سیمایەكی جوان بە پایتەخت بدات.

گوتیشی، "ئەنجامدانی ئەو پرۆژەیە، گرنگی تایبەتی بۆ سەنتەری شاری هەولێر دەبێت پایتەختی هەرێمی كوردستان دەباتە قۆناغێكی ترەوە".

شێوازی جێبەجێکردن: بۆ دەستپێك و جێبەجێكردنی پڕۆژەكە وەك قۆناغی یەكەم لە شەقامی هەولێر - شەقڵاوە تاوەكو شەقامی هەولێر - مەخموور، لیژنەیەك بە سەرۆكایەتیی جێگری پارێزگار بۆ كاروباری هونەری و ئەندامییەتی لایەنە پەیوەندیدارەكان بۆ دیزاینكردن و دیراسەكردنی وردی تێچوو و  پێویستییەكانی ڕادەسپێردرێت.

دواتر لەلایەن بەڕێوەبەرایەتیی ئاودێریی هەولێرەوە، لە سەر پڕۆژەكە بەگشتیی و بەتایبەتی ئەو بەشەی كە دەكەوێتە بەشی ڕۆژهەڵاتی شاری هەولێر و بە تەنیشت هەریەك لە گەڕەكەكانی پێنجی حەسارۆك و گەلاوێژ و فەرمانبەران و چەند گەڕەكێكی دیكەدا دەڕوات، پرزنتیشنێكی تایبەت پێشكەشكراوە و لەلایەن ئامادەبووانەوە گفتوگۆی لەبارەوە كراوە.

ئەوەی پێویستە بیزانیت: كۆڕنیشی هەولێر كە ڕێڕەوێكی ئاوییە و لە ساڵی 1972 بۆ پاراستنی هەولێر لە لافاو دروستكراوە، زیاتر لە وەرزی زستان ئاوی تێدا كۆدەبێتەوە، بەڵام بەهۆی مانەوەی ئاوەكە و تێكەڵبوونی بە ئاوەڕۆی بەشێك لە گەڕەكەكان و پاشماوەی ماڵان و خۆڵ و خاشاك، بۆنێكی ناخۆش دروست دەبێت و بووەتە هۆی بێزاریی خەڵك، ئێستا پلانی پارێزگای هەولێر  ئەوەیە کە دیمەنەكە پێچەوانە بكاتەوە و بیكات بە پڕۆژەیەكی گرنگی گەشتیاری.