لە نیویۆرک گەورەترین کۆنگرەی نێودەوڵەتی تایبەت بە کەمپی هۆل دەبەسترێت

ئاڤا نیوز

ئەمڕۆ هەینی لەبارەگای کۆمەڵەی گشتی نەتەوەیەکگرتووەکان لە شاری نیویۆرکی ئەمریکا و بە بەشداری نوێنەرانی 180 دەوڵەتی جیهان، گەورەترین کۆنگرەی نێودەوڵەتی تایبەت بە داخستنی کەمپی هۆلی ڕۆژئاوای کوردستان بەڕێوەدەچێت.

چیرۆکی سەرەکی: دوای کۆتاییهاتنی داعش لە سووریا، زیاتر لە 40 هەزار ژن و منداڵی چەکدارانی داعش لە کەمپی هۆلی ڕۆژئاوای کوردستان ڕاگیراون، لەو ژمارەیەش 23 هەزار کەسیان عێراقی بوون، بەڵام تائێستا عێراق 18 هەزار ژن و منداڵی خاوەن ڕەگەزنامەی عێراقی لەو کەمپەوە بۆ وڵات گەڕاندووەتەوە و دوای شیاندنەوەیان، بەشێکیان تێکەڵ بە کۆمەڵگا کراونەتەوە.

ڕاگەیێنراوی فەرمی: ئاژانسی فەرمی هەواڵی عێراق بڵاویکردەوە، کۆنگرەکە بە سەرپەرشتی حکومەتی عێراق لەناو بارەگای نەتەوەیەکگرتووەکان لە شاری نیویۆرک بەڕێوەدەچێت و تێیدا نوێنەرانی 180 دەوڵەت، 11 ڕێکخراوی نێودەوڵەتی، 25 ڕێکخراوی سەر بە نەتەوەیەکگرتووەکان و هەشت ڕێکخراوی کۆمەڵگەی مەدەنی بەشداریی تێدا دەکەن، لە کۆنگرەکەشدا چۆنیەتی بە یەکجاری داخستنی کەمپی هۆل تاوتوێ دەکرێت.

بۆچی گرنگە: لە کۆنگرەکەدا سێ پرس تاوتوێ دەکرێن ئەوانیش بریتین لە مەترسییەکانی مانەوەی کەمپی هۆل لەسەر ئاسایشی نێودەوڵەتی، ئەزموونی "سەرکەوتوویی" عێراق لە گەڕانەوەی خێزانە بە ڕەگەز عێراقییەکان، لەگەڵ هاندانی وڵاتانی دیکەش تا هاووڵاتیەکانیان لەو کەمپەوە بۆ وڵاتانی خۆیان بگوازنەوە و کەمپەکە بە یەکجاری دابخرێت.