دادگای سووریا فەرمانی دەستگیرکردن بۆ بەشار ئەسەد دەردەکات

ئاڤا نیوز

وەزارەتی دادی سووریا بەشێوەی ئامادەنەبوو (غیابی) فەرمانی دەستگیرکردنی بۆ بەشار ئەسەد، سەرۆکی هەڵاتووی وڵاتەکەی دەرکرد، فەرمانەکەش بەتۆمەتی ئەنجامدانی تاوانی کوشتن، ئەشکەنجە و دروستکردنی شەڕی ناوخۆ دەرکراوە.

وێنە گەورەکە: لە ساڵانی شەڕی ناوخۆی سووریا 2011-2024، دەسەڵاتەکەی ئەسەد بە تاوانی جەنگ، بەکارهێنانی چەکی کیمیایی، ئەشکەنجەدان تا کوشتنی دەستگیرکراوەکان و کۆمەڵکوژی تۆمەتبارکرا، بۆیەش داوای کۆتاییهاتنی دەسەڵاتەکەی لە دادگاکانی ئەوروپا دۆسیەی دەستگیرکردن و لێپرسینەوە لەسەر خۆی و ئەندامانی باڵای حکومەتەکەی کراوەتەوە.

نووسراوی فەرمی: بەگوێرەی نووسراوێک کە دادگای دیمەشقی سەر بە وەزارەتی دادی سووریا ڕۆژی 25ـی ئەم مانگە دەریکردووە، بەشار ئەسەد، سەرۆکی هەڵاتووی سووریا بەگوێرەی چوار ماددەی یاسای سزادان و یاسای قەدەغەی ئەشکەنجەدان، فەرمانی دەستگیرکردنی بۆ دەرچووە، لە فەرمانەکەدا بۆ ناسینەوەیشی هەندێک نیشانەی کەسایەتی ئەسەد لەگەڵیدا نووسراون لەوانەش باڵای درێژە و دەوروبەری 189 سانتیمەترە، ناوچەوانی پانە، لووتی درێژە، چاوی شینن و پێستی سپییە، داواکراوە لەهەر کوێ بینرا هێزە ئەمنییەکانی وڵات دەستگیریی بکەن.

زانیاریی زیاتر: فەرمانەکە ژمارە 1ـی تایبەت بە دۆسیەی ڕووداوەکانی دەرعای ساڵی 2011ـی پێدراوە، ئەوەش مانای دەستپێکی لێکۆڵینەوە فەرمییەکانە لەسەر ئەو پێشێلکارییانەی پارێزگاکە لە سەرەتای خۆپیشاندانەکانی سووریاوە بەخۆیەوە بینیونی، فەرمانەکەش دوای نۆ مانگ لە کەوتنی دەسەڵاتەکەی ئەسەد هات. ئێستا لە ڕووسیا دەمێنێتەوە و ئەو وڵاتە مافی مانەوەی مرۆیی پێ بەخشیووە.

دەقی فەرمانەکەی دادگای سووریا بە زمانی عەرەبی