تۆنی بلێر دەسەڵاتی ڕاگوزەری غەززە بەڕێوەدەبات

ئاڤا نیوز

بەپێی ڕاپۆرتی میدیاکانی بەریتانیا، تۆنی بلێر، سەرۆکوەزیرانی پێشووتری بەریتانیا، ڕەنگە ڕۆڵێکی سەرەکی و سەرکردایەتی ببینێت لە دەسەڵاتێکی ڕاگوزەری بۆ کەرتی غەززە، وەک بەشێک لە پلانی ئەمریکی بۆ کۆتاییهێنان بەو جەنگەی ماوەی دوو ساڵە بەردەوامە.

زانیاری بەدەستهاتوو: هەریەک لە کەناڵی BBC و گۆڤاری زە ئیکۆنۆمیست ئاماژەیان بەوە کردووە، ڕەنگە تۆنی بلێر بە پشتیوانی نەتەوەیەکگرتووەکان و وڵاتانی کەنداو سەرکردایەتی ئەو دەسەڵاتە ڕاگوزەرییە بکات.

زانیاریی زیاتر: ئەو دەسەڵاتە بە ناوی "دەسەڵاتی ڕاگوزەری نێودەوڵەتی بۆ غەززە" دەناسێنرێت، هەوڵ دەدات بۆ ماوەی پێنج ساڵ بە بڕیارێکی نەتەوەیەکگرتووەکان ببێتە "دەسەڵاتی باڵای سیاسی و یاسایی" غەززە، پێش ئەوەی دەسەڵاتەکە ڕادەستی فەڵەستینییەکان بکرێتەوە.

ئەوەی پێویستە بیزانیت: لە سەرەتادا ناوەندی دەسەڵاتە ڕاگوزەرەکە لە میسر دەبێت، لە نزیک سنووری باشووری غەززە، دواتر کاتێک بارودۆخی ئەمنی کەرتەکە باش بوو دەسەڵاتە ڕاگوزەرەکە دەگوازرێتەوە بۆ ناو کەرتی غەززە.

باکگراوند: تۆنی بلێر، لە نێوان ساڵانی 1997 بۆ 2007 سەرۆکوەزیرانی بەریتانیا بووە و لە سەردەمی ئەودا وڵاتەکەی لەگەڵ ئەمریکا بەشداری لە داگیرکردنی عێراقدا کرد، هەروەها بەشدار بووە لە گفتوگۆکان لەگەڵ ئیدارەی دۆناڵد ترەمپ و بەرپرسانی دیکە سەبارەت بە دەسەڵاتی ڕاگوزەری داهاتوو لە کەرتی غەززە لە دوای کۆتاییهاتنی جەنگی ئیسرائیل و حەماس.