لەتیف ڕەشید و پزیشکیان: بۆ ڕاگرتنی شەڕ پێویستە کاری جددی بکرێت

ئاڤا نیوز

هەردوو سەرۆککۆماری عێراق  و ئێران کۆبوونەوە و دەڵێن، بۆ ڕاگرتنی شەڕ و کۆتاییهێنان بە دەستدرێژییەکان بۆ سەر وڵاتانی ناوچەکە، دەبێت لە ئاستی نێودەوڵەتی کاری جددی بکرێت.

وێنە گەورەکە: عێراق و ئێران لە ئاستی سیاسیی، ئابووریی و بازرگانی پەیوەندییەکی بەهێزییان هەیە و لە دوو دەیەی ڕابردوو بازارەکانی عێراق بوونەتە یەکێک لە گەورەترین سەرچاوەکانی ساغکردنەوەی کاڵای ئێرانی، هاوکات هەردوو وڵات لەبواری ئەمنیی، کولتووریی و چەندین بواری دیکەشدا هەماهەنگییەکی پتەویان هەیە.

ڕاگەیێنراوی فەرمی: سەرۆکایەتی کۆماری عێراق بڵاویکردەوە، لەتیف ڕەشید، سەرۆککۆماری عێراق لەپەراوێزی کۆبوونەوەی کۆمەڵەی گشتی نەتەوەیەکگرتووەکان لە نیویۆرک، چاوی بە مەسعود پزیشکیان، سەرۆککۆماری ئێران کەوتووە و هەردوولا جەختیان لە زیاتر برەودان بە پەیوەندییەکانی نێوان بەغداو تاران کردووەتەوە.

زانیاریی زیاتر: لە کۆبوونەوەکەدا بەپێویست زانراوە کاری جددی لە ئاستی نێودەوڵەتی بکرێت بۆ ڕاگرتنی شەڕ و ململانێکان، بەتایبەتیش کۆتاییهێنان بە برسیکردنی خەڵکی غەززە و دەستدرێژییەکان بۆسەر وڵاتانی ناوچەکە کە لە چوارچێوەی کارکردندان بۆ تێکدانی ئارامی ناوچەکە.