مالیکی : مەرج نییە سەرۆکوەزیرانی داهاتووی عێراق شیعە مەزهەب بێت

ئاڤا نیوز

بۆ یەکەمجار لە ماوەی زیاتر لە 22 ساڵدا، نووری مالیکی، سەرۆکی هاوپەیمانی دەوڵەتی یاسا، دیدگای خۆی گۆڕی و لێدوانێکی جیاواز لە لێدوانەکانی پێشووی دا.

چیرۆکی سەرەکی: لەگەڵ نزیکبووونەوەی لە هەڵبژاردنی ئەنجوومەنی نوێنەرانی عێراق، کەسی یەکەمی حیزبە عێراقییەکان بە ئامانجی ڕاکێشانی سەرج و هەستی دەنگدەران قسە و باسی جیاواز دەکەن تاوەکو کاریگەری دروستبکەن.

لێدوانی فەرمی: نووری مالیکی، سەرۆکی هاوپەیمانی دەوڵەتی یاسا ڕایگەیاند، دەستووری عێراق هیچ مەرجێکی تێدا نییە کە سەرۆکوەزیرانی داهاتوو شیعە مەزهەب بێت، ئاماژەی بەوەشکرد کە ئەم پشکە دەرەنجامی تەوافقی سیاسیی بووە نەک دەقێکی دەستووری.

مالیکی ئاشکرای کرد، ئێستا 10 کاندید بۆ پۆستی سەرۆکوەزیران ئامادەیە، بەڵام هیچ کامیان بەبێ ڕەزامەندی چوارچێوەی هەماهەنگی ئەو پۆستە وەرناگرێت.

باکگراوند: لە دوای ڕوخانی ڕژێمی سەددام لە ساڵی 2003 ـەوە پۆستی سەرۆکوەزیرانی عێراق لای کەسایەتییەکی شیعە مەزهەبە وەک چۆن پۆستی سەرۆککۆمار لای کوردە و بەهەمان شێوەش سەرۆکی پەرلەمان لای عەرەبی سوننە مەزهەبە بەڵام هیچ دەقێکی دەستووری یان یاسایی ئەم بابەتەی بەم شێوەیە ڕێکنەخستووە، مالکیش وەک کەسایەتییەکی شیعە مەزهەب هەمیشە پێداگربووە لەوەی پۆستی سەرۆکوەزیران کە باڵاترین دەسەڵاتی عێراقە تەنیا پشکی شیعەیە و لەنێو شیعەشدا پشکی دەوڵەتی یاسایە.