عێراق بەفەرمی هەناردەکردنی نەوتی هەرێمی کوردستانی ڕاگەیاند

ئاڤا نیوز

وەزیری نەوتی عێراق بەفەرمی دەستپێکردنەوەی هەناردەکردنی نەوتی هەرێمی کوردستانی ڕاگەیاند و  جەختیشی کردەوە کە بڕی هەناردەکراو لە رۆژانی داهاتوودا بەشێوەیەکی بەرچاو زیاد دەکات.

وێنە گەورەکە: دوای دوو ساڵ و شەش مانگ و دوو ڕۆژ لە وەستانی، بەرەبەیانی ئەمڕۆ شەممە 27ـی ئەیلوولی 2025 جارێكی دیكە هەناردەکردنی نەوتی هەرێمی کوردستان دەستیپێكردەوە.

لێدوانی فەرمی: حەییان عەبدولغەنی، وەزیری نەوتی عێراق ڕایگەیاند: ئەم هەنگاوە لە چوارچێوەی رێککەوتننامەی دوایی نێوان بەغدا و هەولێر دێت، کە تێیدا بڕیاردرا هەرێمی کوردستان 190 هەزار بەرمیل نەوت رۆژانە بۆ حکومەتی فیدراڵی بنێرێت، لەبەرامبەردا بەغدا پابەند دەبێت بە پێدانی هەموو ئەو شایستە داراییانەی کە لەچوارچێوەی ڕێککەوتنەکە هاتووە.

لەلایەکی دیکەوە: چاودێران پێیان وایە ئەو رێککەوتنەی کە دوو رۆژ پێش ئێستا لەلایەن بەغدا و هەولێرەوە واژۆ کرا، وەک هەنگاوێکی گرنگ بۆ کۆتاییهێنان بە قەیرانی هەناردەکردنی نەوت دادەنرێت کە بۆ ماوەی زیاتر لە دوو ساڵ بەردەوام بوو، چونکە هەردوولا لەو ماوەیەدا بەهۆی وەستانی هەناردەی نەوت لەڕێگەی هێڵی تورکیاوە زیانی دارایی زۆریان بەرکەوت.

ئەمەش بزانە: دوای بڕیارێکی ناوبژیوانی نێودەوڵەتیی پاریس، هەناردەکردنی نەوت لەڕێگەی هێڵی کوردستان - جیهانەوە لە مانگی ئازاری 2023ـەوە ڕاگیرا، ئەو بڕیارە ملیارەها دۆلار زیانی بە عێراق گەیاند.

پێشبینیش دەکرێت دەستپێکردنەوەی هەناردەکردن لەڕێگەی جەیهانەوە یارمەتیدەر بێت لە بەهێزکردنی داهاتەکانی عێراق و کەمکردنەوەی گرژییەکانی نێوان ناوەند و هەرێم و چارەسەرکردنی دۆسیە هەڵپەسێردراوەکانی نێوان هەردوولا.