غەزال هۆستانی: نەوتی كوردستان لەڕێگەی كەشتییەوە ڕەوانەی بازاڕەكانی جیهان دەكرێت

ئاڤا نیوز

غەزال هوستانی، بەڕێوەبەری گشتیی لە وەزارەتی سامانە سرووشتییەكانی هەرێمی كوردستان ئاشكرای دەكات كە دوای گەیشتنی نەوتی هەرێمی كوردستان بۆ بەندەری جەیهان، لە توركیا لەڕێگەی كەشتییەوە ڕەوانەی بازاڕەكانی جیهان دەكرێت.

چیرۆکی سەرەکی: دوای ڕێککەوتنێکی سێ لایەنە لە نێوان هەرێمی کوردستان و عێراق و کۆمپانیاکانی بواری بەرهەمهێنانی نەوت، بەرەبەیانی ئەمڕۆ هەناردەی نەوت دوای زیاتر لە دوو ساڵ بۆ بەندەری جەیهانی تورکیا دەستیپێکردەوە. 

لێدوانی فەرمی: د.غەزال هۆستانی، بەڕێوەبەری گشتیی لە وەزارەتی سامانە سرووشتییەكانی هەرێمی كوردستان بە ئاڤا میدیای ڕاگەیاند: هەموو ئەو كۆمپانیایانەی كە فرۆشتنی ناوخۆییان دەكرد لەمەودوا نەوتی خۆیان دەخەنە نێو بۆڕیی نەوتی عێراق – توركیا، هەروەها ئەو كۆمپانیایانەشی كە لە بەرهەمهێنانی نەوت وەستابوون ئەگەر سۆمۆ لە كاتی دیاركراوی خۆیدا شایستەكانیان پێبدات لەو بڕوایەم ئەوانیش دەست بە كار بكەنەوە.

-    پێشووتر كۆمپانیاكان لەڕێگەی حكومەتی هەرێمی كوردستانەوە نەوتەكەیان لە جەیهان بە نرخێكی باش دەفرۆشت، بەڵام دوای وەستانی هەناردەكردنی نەوت، كۆمپانیاكان بە ناچاری فرۆشتنی نێوخۆییان بە نرخێكی كەمتر دەكرد ئەمەش بۆ ئەوەی لە كاركردن نەوەستن، ئەمەش كاریگەری نەرێنی بۆ سەر كێڵگە نەوتییەكانی هەرێمی كوردستان لەڕووی تەكنیكییەوە هەبوو، بۆیە بەرهەمهێنانی ڕۆژانە لە 400 هەزار بەرمیلەوە دابەزیبوو بۆ 230 هەزار بەرمیل.

-    نەوتەكە ئەمڕۆ بەڕێكرا و دەگاتە بەندەری جەیهان و لەوێ دەخرێتە نێو عەمبارەكانی نەوتەوە و پاشان بە كەشتی بار دەكرێت و لەو ڕێگەیەوە ڕەوانەی بازاڕەكانی جیهان دەكرێت.