سوودانی پەیوەندی بە چوار بەرپرسی باڵای کوردەوە دەکات

ئاڤا نیوز

دوای دەستپێکردنەوەی هەناردەی نەوتی کوردستان ئەمڕۆ شەممە سەرۆکوەزیرانی عێراق بە جیا پەیوەندی تەلەفۆنی لەگەڵ چەند سەرکردەیەکی هەرێمی کوردستان ئەنجامدا.

وێنە گەورەکە: دوای دوو ساڵ و دوومانگ لە وەستانی، نەوتی هەرێمی کوردستان بە ڕێککەوتنێکی نێوان هەولێر و بەغدا لە ڕێگەی بەندەری جەیهانەوە هەناردەی دەرەوە کرایەوە.

چیرۆکی سەرەکی: سوودانی بە جیا پەیوەندی تەلەفۆنی لەگەڵ هەر یەک لە؛ سەرۆک بارزانی، مەسرور بارزانی، سەرۆکوەزیرانی هەرێمی کوردستان و نێچیرڤان بارزانی، سەرۆکی هەرێمی کوردستان و بافڵ تاڵەبانی، سەرۆکی یەکێتی نیشتمانی کوردستان ئەنجامدا.

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیرانی عێراق، "سوودانی پێزانینی خۆی بۆ هەڵوێستی سەرکردە و هێزە کوردییەکان دەربڕیووە کە بەشداربوون لە گەیشتن بە ڕێککەوتنەکەی ئەم دواییە بۆ دەستپێکردنەوەی هەناردەکردەی نەوتی کوردستان و دانانی داهاتەکەی لە گەجنینەی ناوەندی و پابەندبوون بە پاڵپشتیکردنی بەرژەوەندییەکانی گەلی عێراق و یەکخستنی هەوڵە هاوبەشەکانی نێوان حکومەتی فیدراڵی و حکومەتی هەرێمی کوردستان، ئەمەش بووەتە هۆکار بۆ واژۆکردنی ڕێککەوتنێک بەپێی بڕگەکانی دەستوور و یاسای بودجە".

زانیاریی زیاتر: لە بەشێکی دیکەی ڕاگەیێنراوەکە هاتووە، "سوودانی جەختی لەو پەیڕەوانە کردوەتەوە کە دەبنە هۆکار بۆ پتەوکردنی گەشەپێدانی نیشتمانی و پێشخستنی بەرژەوەندی گشتی. هاوکات بەرجەستەکردنی ئامانجە هاوبەشەکانی هەردوولا. ئەمەش لە پێناو بەدیهێنانی پێشکەوتنی هەمەلایەنەی ئابووری و پاراستنی سامان و دابەشکردنی بەشێوەیەکی دادپەروەرانە بەسەر هەموو ڕۆڵەکانی گەلی عێراقدا لە سەرتاسەری وڵات".