دوای بەدواداچوونی ئاڤا، بۆ ڕێگری لە قاچاخیەکانی سنووری دیالە ڕێکارەکان تووندتر دەکرێن

ئاڤا نیوز

دوو ڕۆژ لەمەوبەر، ئاڤا بەدواداچوونێکی وردی لەبارەی بەقاچاخبردنی کاڵا لە دەروازەی باوە مەحموودی سنووری دیالە بڵاوکردەوە. دەستبەجێ پۆلیسی دیالە ڕێکارەکانی تووندتر کرد و بارهەڵگرێکی پڕ لە بیرەیان دەستبەسەردا گرت کە ویستوویەتی لەو سنوورە تێپەڕ ببێت.

زانیاریی بەدەستهاتوو: بەگوێرەی زانیارییەکانی ئاڤا، بازگەی باوە مەحموود لە سنووری قەزای خانەقین، کە دوای 16ـی ئۆکتۆبەر بووەتە خاڵێکی سنووری لەنێوان هەرێمی کوردستان و عێراق، گۆڕاوە بۆ ناوەندێکی قاچاخچێتی و گەندەڵی، ڕۆژانە سەدان تۆن کاڵا و کەل و پەلی بێ مۆڵەت لەو بازگەیە تێپەڕ دەبن.

زانیاریی تایبەت: سەرچاوەیەک لە پۆلیسی دیالە بە ئاڤای گوت، "نزیک بازگەیەک لە ناوچەی ئەلوەزیریە، لە جەرگەی ناحیەی بەنی سەعد، باشووری ڕۆژئاوای بەعقوبە، دەستیان بەسەر بارهەڵگرێکدا گرتووە کە پڕ بووە لە خواردنەوەی کحولی بێ مۆڵەت".

"دوای دەستبەسەر داگرتنی بارهەڵگرەکە دەرکەوتووە، دووهەزار و 700 کارتۆنی خواردنەوەی بیرەی تێدابووە، کە هەر کارتۆنێک 24 قوتووی لەخۆگرتووە، بەبێ مۆڵەت ویستوویەتی بپەڕێتەوە، بارهەڵگرەکە دەستی بەسەردا گیراوە و لێکۆڵینەوە لەگەڵ شوفێرەکەی دەکرێت."

ئەوەی پێویستە بیزانیت: دوو ڕۆژ لەمەوبەر، دیار شەوکەت، بەڕێوەبەری پۆلیسی خانەقین، بە ئاڤای گوت، گواستنەوەی کاڵا بە قاچاغ لەو بازگەیە هیچ بنەمایەکی نییە و تەنیا ڕێگە بە بەرهەمی ناوخۆیی کوردستان دەدرێت بچێتە نێو عێراق و هیچ کاڵایەکی هاوردەکراو لەو بازگەیە ناچێتە عێراق و بەپێچەوانەشەوە.