لە هەولێر 12 تیم ئاوەڕۆکان پاک دەکەنەوە و سەرقاڵی ئامادەکارین بۆ وەرزی باران بارین

ئاڤا نیوز

بەڕێوەبەرایەتی ئاوەڕۆ و تیمەکانی شارەوانی 12 لیژنەیان پێکهێناوە وەک ئامادەکاری بۆ هاتنی وەرزی باران بارین و هەموو مەزرا و ڕێگاکانی ئاوەڕۆ پاک دەکەنەوە تا ڕێگری بکەن لە پەنگخواردنەوەی ئاو.

وێنە گەورەکە: ساڵانە لە وەرزی پایز و زستان لە کاتی باران بارین هەندێک شەقامی هەولێر دووچاری پەنگخواردنەوەی ئاو دەبێ و  جەنجاڵی دروست دەکات. چەند ساڵێکە بەڕێوەبەرایەتی ئاوەڕۆ و شارەوانی سەرقاڵی کەمکردنەوەی ئاستی پەنگخواردنەوەن و ئەمساڵیش لە ڕێگای چەند پڕۆژەیەکەوە ئەمە جێبەجێ دەکرێت.

لێدوانی فەرمی: زەردەشت عەبدولخاڵق سەرسام، بەڕێوەبەری ئاوەڕۆی هەولێر بە ئاڤا میدیای وت، بە فەرمانی سەرۆکوەزیران مەسرور بارزانی بڕی دوو ملیار دینار وەک بودجەی تەنگەتاوی تەرخانکراوە. ئێستا لە چەند شوێنێکی هەولێر دەستکراوە بە خاوێنکردنەوەی ڕێڕەوەکانی ئاوەڕۆ. جگە لەوە چەندین بۆری جۆری (ئەسیلین) لە تورکیا کڕاوە و لەماوەی چوار بۆ پێنج ڕۆژی تر دەگات. ئەم هەنگاوانە تاڕادەیەکی زۆر کێشەی پەنگخواردنەوەی ئاو لە شەقامەکان چارەسەر دەکات.

زانیاریی زیاتر: بەگوتەی زەردەشت، سەرنجەکە لەسەر  ئەو گەڕەک و شەقامانەیە کە ساڵانە ئاو تێیاندا پەنگدەخواتەوە، وەکو گەڕەکی سەیداوە، شەقامی 100 مەتری، گەڕەکی هەولێری نوێ، گەڕەکی تەیراوە و چەند شوێنێکی دیکە و لەڕێگەی چەند پڕۆژەیەکەوە هەوڵدەدرێت ئەم گرفتە چارەسەر بکرێت.