ئاڤای خەڵک؛ ڕاوەماسی بە کارەبا و بۆمب لە تەق تەق سامانی ماسی بەرەو لەناوچوون دەبات

ئاڤا نیوز

بەکارهێنانی کارەبا و بۆمب بۆ ڕاوکردنی ماسی لە ڕووبار و چەمەکانی تەق تەق، نیگەرانی ئەو ڕاوچییانەی لێکەوتووەتەوە کە پیشەی سەرەکییان ڕاوەماسییە، قایمقامیش دەڵێت، "ئەم دیاردەیە لە توانای تیمەکانمان زیاترە لەبەر ئەم بارودۆخە داراییەی ئێستا هەیە."

ببینە و ببیستە: هاووڵاتیەکی دانیشتووی شارەدێی تەق تەق، کە پیشەی سەرەکی ڕاوەماسییە، ڤیدیۆیەکی ناڕەزایەتی بۆ "ئاڤا" ناردووە و تێیدا نیگەرانی قووڵی خۆی لەسەر کەمبوونەوەی سامانی ماسی لە ڕووبار و چەمەکانی ناوچەکەدا دەربڕیوە. ئاماژە بەوە دەکات کە وەرزی ڕاوەماسییە، بەڵام بەهۆی دیاردەی بەکارهێنانی کارەبا و بۆمب لەلایەن هەندێک کەسەوە بۆ ڕاوکردن، سامانی ماسی بە شێوەیەکی بەرچاو دابەزیوە.

زانیاریی بەدەستهاتوو: ئەو هاووڵاتیە جەخت دەکاتەوە کە ئەم شێوازە نایاسایی و زیانبەخشە، جگە لە ماسی، هەموو گیانەوەرێکی تری ناو ئاوەکەش دەکوژێت و کاریگەرییەکی وێرانکەری لەسەر ژینگەی ئاوی و کەمبوونەوەی ژمارەی ماسییەکان هەبووە. بە وتەی ناوبراو، "ئەگەر بەم شێوەیە بڕوات، چەند ساڵێکی تر شتێکمان بە ناوی سامانی ماسی نامێنێت." ئەو گلەیی زۆری لە لایەنە پەیوەندیدارەکان هەیە و بە کەمتەرخەم و بێباک ناویان دەبات لە بەرامبەر ئەم دیاردەیەدا.

لێدوانی فەرمی: قایمقامی کۆیە بە ئاڤای ڕاگەیاند،  ئەمە کارێکی زۆر خراپە بەرامبەر بە ژینگە و ژیانی ئاژەڵان. تیمەکانی پاراستنی ژینگە بەردەوام چاودێری ڕووبار و چەمەکانیان کردووە، بەڵام بەهۆی نەبوونی بودجە و پێداویستییەکانی کار و نەبوونی نەسریە، کار و چالاکییەکانیان سنووردار بووە. "ئەم دیاردەیە لە توانای تیمەکانمان زیاترە لەبەر ئەم بارودۆخە داراییەی ئێستا هەیە."

زانیاریی زیاتر: سەرەڕای ئەم ئاستەنگانە، قایمقامی کۆیە دڵنیایی دا کە "هەموو تواناکانمان دەخەینە گەڕ بۆ ئەوەی ئەم دیاردەیە بنبڕ بکەین و سەرپێچیکاران ڕووبەڕووی یاسا بکەینەوە."