ئاڤای خەڵک؛ دانیشتووانی گوندی دێڵزێ لە چۆمان داوای چاککردنی ڕێگاکەیان دەکەن

ئاڤا نیوز

دانیشتووانی گوندی دێڵزێ، یەکێک لە گوندە جوان و شاخاوییەکانی سنووری قەزای چۆمان، داوای چاککردن و نۆژەنکردنەوەی ڕێگای گوندەکەیان دەکەن.

چیرۆکی سەرەکی: گوندی دێڵزێ، کە 20 ماڵی تێدا نیشتەجێن و دانیشتووانەکەی بە کشتوکاڵەوە خەریکن، جگە لەوەی ناوچەیەکی کشتوکاڵییە، هاوکات شوێنێکی گەشتیاریی سەرنجڕاکێشە و ساڵانە لە هەموو وەرزەکاندا ژمارەیەکی زۆر گەشتیار ڕووی تێدەکەن.

بەهۆی شاخاویبوونی ناوچەکە و خراپی ڕێگاکە، بەتایبەتی لە وەرزی سەرما و سۆڵەدا، دانیشتووانی گوندەکە و گەشتیارانیش ڕووبەڕووی گرفتی زۆر دەبنەوە.

لێدوانی فەرمی: ئەحمەد بارزان، قایمقامی قەزای چۆمان بە ئاڤای وت، دەرخستە بۆ پڕۆژەی چاککردنی ڕێگاکە ئامادەکراوە و لەگەڵ وەزارەتی ئاوەدانکردنەوە هەماهەنگی کراوە. وتیشی، "لە بەرنامەماندایە و چاوەڕێی هاتنی پارە دەکەین. بە دڵنیاییەوە ئەو شوێنانە لە پێشینەی کارەکانمانن."