سەرۆک بارزانی: دەنگی کوردستان ڕێگایەکی سەردەمیانە بوو بۆ گەیاندنی دەنگی مەزڵوومیەتی کورد

ئاڤا نیوز

لە یادی 61 ساڵەی دامەزراندنی ڕادیۆی دەنگی کوردستان، سەرۆک بارزانی پەیامێکی بۆ بەڕێوەبەر و کارمەندانی ڕادیۆکە نارد و دەڵێت: دامەزراندنی ئەو ئێزگەیە لەو سەردەمە ڕێگایەکی سەردەمیانە بوو بۆ گەیاندنی دەنگی مەزڵوومیەتی کورد و دۆزە ڕەواکەی بە ڕای گشتیی عێراق و ناوچەکە و جیهان.

پەیامی فەرمی: لە پەیامێکدا، سەرۆک مەسعود بارزانی جگە لە پیرۆزبایی بۆ بەڕێوەبەر و ستافی ئێزگەکە دەشڵێت: دامەزراندنی ئێزگەی دەنگی کوردستان لەو ڕۆژگارە سەخت و پڕ شانازییەدا، هەنگاوێکی گرنگ بوو لە گەیاندنی دەنگی شۆڕش و هەواڵەکانی نەبەردیی و داستانەکانی پێشمەرگە بە خەڵکی خۆڕاگری سەرانسەری کوردستان.

لە بەشێکی دیکەی پەیامەکەی سەرۆک بارزانی دەڵێت: سوپاسی هەموو ئەو خەباتگێڕ و تێکۆشەرانە دەکەم کە ڕۆڵیان لە بەردەوامی و زیندووهێشتنەوەی دەنگی دلێری ئێزگەی دەنگی کوردستاندا هەبووە. داواتان لێدەکەم بەردەوام بن لە کارکردنی میدیایی ڕاستگۆ و سەنگین و دەستگرتن بە بەها نەتەوەیی و نیشتیمانی و مرۆڤایەتییەکان و بەردەوامی بەو نەهجە ئازاد و شۆڕشگێڕانە و دیموکراسیە بدەن کە ئەو ئێزگەیەی لە پێناودا دامەزراوە.

باکگراوند: ئێزگەی دەنگی کوردستان، سەرەتا بەناوی (دەنگی کوردستانی عێراق) وەک زمانحاڵی شۆڕشی ئەیلول ڕۆژی 1963-09-28 لە ئەشکەوتی گردەڕەش پەخشی دەستپێکرد. ڕۆژانە یەک کاتژمێر و نیو پەخشی بەهەردوو زمانی کوردی و عەرەبی هەبوو. دواتر پەخشی فراوان کرا و بوو بە هاندانێکی گرنگ بۆ پاڵپشتی پێشمەرگە.