پەرلەمانتارێکی لوبنان پێشنیازی "کاتی کۆتایهاتنی هاوسەرگیری" دەباتە پەرلەمان

ئاڤا نیوز

لەسەر پێشنیازی پەرلەمانتارێکی وڵاتەکە بۆ هەموارکردنەوەی یاسای باری کەسێتیی، بڕیارە لە ماوەی داهاتوودا پەرلەمانی لوبنان تاوتوێی پێشنیارێک بکات بۆ دیاریکردنی کاتی کۆتایهاتنی هاوسەرگیری لە دوای پێنج ساڵ، ئەمەش واتە ماوەی هاوسەرگیریی ماوەی پێنج ساڵ دەبێت دەشکرێت ئەو ماوەیە بە ڕەزامەندی هەردوو هاوسەرەکە درێژبکرێتەوە.

وێنە گەورەکە: لە لوبنان بۆ هەر پێکهاتە و ئاین و مەزهەبێک یاسا و ڕێنمایی جیاواز و تایبەت بۆ هاوسەرگیریی هەیە. بۆیەش بەشێک لە پەرلەمانتاران لە مانگی تەممووزی ئەمساڵەوە داوایانکردووە لە سەرانسەری لوبناندا یەک یاسای باری کەسی یەکگرتوو هەبێت، ئەویش بەهۆکاری ئەوەی یاساکانی ئێستای وڵات بنەمای دادپەروەریی و یەکسانی تێیاندا پەیڕەو نەکراوە.

لێدوانی فەرمی: ئلیاس جەرادە، ئەندامی پەرلەمانی لوبنان ڕایگەیاند، لە مانگی تەممووزی ئەمساڵەوە پێشنیازێکی داوەتە پەرلەمان تا هاوسەرگیریی کاتی کۆتاییهاتن "ئێکسپایەر"بوونی بۆ دابنرێت، ئەوەش مانای کۆتایی دەستگیراندارییەکە نییە و ئەگەر هەردوو هاوسەرەکە ڕەزامەند بن، هاوسەرگیرییەکە بەردەوام دەبێت.

زانیاریی زیاتر: بەگوێرەی پێشنیازی ئەو پەرلەمانتارە، دوای پێنج ساڵەکە هەردوو هاوسەرەکە ماوەی سێ مانگ لە یەکتریی دووردەکەونەوە و دوور لە یەکتریی دەژین، لەو ماوەیەدا پێداچوونەوە بە پەیوەندیی و هاوسەرگیرییەکەیان دەکەن کە ئایا دڵخۆش، بەختەر و ڕازین لە ژیانی هاوبەشیان یاخوود نا.

ئەو پێشنیازە لە شەقامی لوبناندا کاردانەوەی لێکەوتووەتەوە و زۆرینەی خەڵک لێی ناڕازین، دەڵێن ئەم پێشنیازە دژی ئاینە و هاوسەرگیریی بۆ درێژایی تەمەنە نەک ماوەیەکی دیاریکراو، بەشێکی خەڵکیش دەڵێن، پێشنیازەکە باشە و ئەوان هەم قبووڵیانە و هەمیش بەدڵیانە.