بە ئامادەبوونی سەرۆکوەزیران مەسرور بارزانی مەراسیمی ڕاگەیاندنی ڕێبەری سەلامەتی بەڕێوە دەچێت

ئاڤا نیوز

بە سپۆنسەری میدیای ئاڤا و بە ئامادەبوونی سەرۆکوەزیران مەسرور بارزانی، مەراسیمی ڕاگەیاندنی ڕێبەری سەلامەتی لە هەولێر بەڕێوە دەچێت. 

وێنە گەورەکە: لەماوەی چەند ساڵی ڕابردوودا بە داتا و ژمارە دەردەکەوێت کە کابینەی نۆیەم و وەزارەتی ناوخۆ بایەخێکی زۆریان بە بەرزکردنەوەی تواناکانی بەرگری شارستانی داوە، چ لە دابینکردنی ئامێر و کەرەستەی پێویست تا دەگاتە بەرزکردنەوەی توانای لۆجستی تیمەکانی ئاگر کوژێنەوە و فریاکەوتن.

زانیاریی زیاتر: ئەمڕۆ یەکشەممە، 28-9-2025 لە مەراسیمێکی تایبەت دا بڕیارە ڕێبەرێکی حەوت بەرگی لەبارەی سەلامەتی فریاکەوتن بڵاوبکرێتەوە، ڕێبەرێکیان تایبەتە بە سەلامەتی پاراستنی باڵەخانەکان لە ئاگر، ئەمەش بە ئامانجی ئەوەی لەگەڵ زیادبوونی ژمارەی تاوەر و باڵەخانەی نیشتەجێبوون توانای بەرگریی شارستانیش بەرزبکرێتەوە تاوەکو لە هەر دۆخێکدا بتوانن بە کەمترین کات و بە باشترین شێوەی کۆنترۆڵی ئاگرکەوتنەوە بکەن. 

ئەوەی پێویستە بیزانیت: لە مەراسیمەکەی ئەمڕۆدا ڕێبەرێکی حەوت بەرگی لەبارەی سەلامەتی فریاکەوتن بڵاودەکرێتەوە و بەمشێوەیەیە؛-

 - ڕێبەرێکیان تایبەتە بە سەلامەتی پاراستنی باڵەخانەکان لە ئاگر.

- یەکێکی تریان تایبەتە بە سیستمی ئاگر کوژێنەوە.

- یەکێکی دیکە لە بەرگەکانی تایبەتە بە سەلامەتی غازی شل LPG بۆ شوێنی نیشتەجێبوون و بازرگانی.

- یەکێك لە بەرگەکانی دیکە تایبەتە بە شوێنە پیشەسازییەکان.

- سەلامەتیی دروستکردنی وێستگەکانی سووتەمەنیی.

- ڕێبەری سەلامەتی سیستەمی ئاگادارکردنەوەی پێشووەختەی ئاگر و زەنگی ئاگادارکردنەوە.

- ڕێبەری سەلامەتی گواستنەوەی ماددە مەترسیدارەکانە.

ئەمەش بزانە: ئامانج لەم ڕێبەرانە بۆ بەرزکردنەوەی ئاستی هۆشیاری گشتییە بۆ خۆ دوورگرتن لە کەوتنەوەی ئاگر و مامەڵەکردن لەگەڵ ماددە مەترسیدارەکان،  ئەم ڕێبەرە لەلایەن لیژنەیەکی تایبەتمەندەوە دانراوە و هەماهەنگی کراوە لەگەڵ وەزارەتە تایبەتمەندەکان، بۆ نموونە ڕاوێژکراوە لەگەڵ وەزارەتەکانی سامانە سروشتییەکان، کارەبا، گشتوگوزار و پلاندانان.