وادەی فرۆشتنی موڵکەکانی کۆمپانیای چاڤی ڕاگەیێنرا

ئاڤا نیوز

وەزارەتی دارایی و ئابووری وادەی فرۆشتنی موڵکەکانی کۆمپانیای چاڤی دیاری کرد و ڕایدەگەیەنێت: هەرکەسێک ئارەزووی کڕینی ئەو موڵکانەی هەیە بەشداری زیادکردنی ئاشکرا بکات.

وێنە گەورەکە: دوای ئەوەی شاسوار عەبدولواحید، خاوەنی هەردوو کۆمپانیای نالیا و چاڤی قەرزێکی زۆری بەناوی وەبەرهێنان لە حکومەتی هەرێمی کوردستان وەرگرتبوو، بڕی قەرزەکان گەیشتووە نزیکەی 92 ملیار دینار، لەسەر سکاڵای وەزارەتی دارایی، دادگا بڕیاری دا دەست بەسەر سەرجەم موڵکەکانی کۆمپانیای چاڤی لاند و نالیا بگیرێت و لە زیاد کردنی ئاشکرا ئەو موڵکانە بفرۆشرێن و قەرزەکانی پێبدرێنەوە.

ڕاگەیێنراوی فەرمی:  وەزارەتی دارایی و ئابووری هەرێمی کوردستان بڵاویکردەوە: ڕۆژی یەکشەممەی داهاتوو 5-10-2025 پڕۆسەی فرۆشتنی "زیادکردنی ئاشکرای موڵکەکانی کۆمپانیای چاڤی بۆ وەبەرهێنانی گەشتیاری - هاوپشکی تایبەت" لەبەڕێوەبەرایەتیی جێبەجێکردنی دووەمی سلێمانی بەڕێوە دەچێت.

زانیاری زیاتر: ژمارەی موڵکەکان 60 موڵکە و بەمەبەستی گەڕانەوەی قەرزەکانی بانکەکانی سەر وەزارەتی دارایی کە بڕەکەی 91 ملیار و 760 ملیۆن و 660 هەزار و 350 دینارە، موڵکەکان بە یەک پاکێج دەفرۆشرێن.

ئەوەی پێویستە بیزانیت: وەزارەتی دارایی ڕایگەیاندووە، هەر کەس و لایەنێک دەیەوێت بەشداری لە پڕۆسەی زیادکردنەکی ئاشکرای کڕینی ئەو موڵکانە بکات، دەتوانێت سەردانی بەڕێوەبەرایەتی جێبەجێکردنی دووەمی سلێمانی بکات بەمەبەستی دەستخستنی زانیاری و ئەنجامدانی ڕێکارە کارگێڕی و یاساییەکان.