بۆ دروستکردنی ڕێبەری سەلامەتی لە چوار ساڵدا 15 هەزار لاپەڕە وەرگێڕاوەتە سەر زمانی کوردی

ئاڤا نیوز

بە سپۆنسەری سەرەکی ئاڤا میدیا، وەزارەتی ناوخۆی حکومەتی هەرێمی کوردستان یەکەم ڕێبەری سەلامەتی لە حەوت بەرگ بڵاوکردەوە. ڕاوێژکاری یاسایی وەزارەتی ناوخۆ دەڵێت: ئەم ڕێبەرە لەماوەی چوار ساڵدا جێبەجێ کراوە و 15 هەزار لاپەڕەمان لە زمانە بیانییەکان وەرگێڕایە سەر زمانی کوردی. 

وێنە گەورەکە: بڵاوکردنەوەی یەکەم ڕێبەری سەلامەتی بە ئامادەبوونی مەسرور بارزانی، سەرۆکوەزیرانی کوردستان لە هەولێر بەڕێوەچوو. ئەم ڕێبەرە دەبێتە بنەمایەک بۆ بەرزکردنەوەی ڕادەی سەلامەتی لە سیستمی بەرگری شارستانی.

لێدوانی فەرمی: د. سامی جەلال، ڕاوێژکاری یاسایی وەزارەتی ناوخۆی حکومەتی هەرێمی کوردستان میوانی گەشتی هەواڵەکانی کاتژمێر 12ـی نیوەڕۆی ئاڤا بوو وتی، سوپاسێکی تایبەت بۆ ئاڤا تیڤی کە زیاتر لە 10 ڕۆژە لەگەڵ وەزارەتی ناوخۆیە و سپۆنسەری ئەم مەراسیمەی کرد. هاوکات ئەو فیلمە دیکۆمێنتاریەی لە مەراسیمەکە نمایش کرا، ئاڤا بە بەرزترین توانا و کوالێتی بۆیان بەرهەمهێناین.

د. سامی جەلال لەبارەی ڕێبەری سەلامەتی ئەمانەشی وت:

-    وەزارەتی ناوخۆ لە مانگی یەکی ساڵی 2021 فەرمانێکی دەرکرد بۆ پێکهێنانی لیژنەیەکی باڵا بەمەبەستی داڕشتنی ڕێبەری سەلامەتی.

-     ئێمە لەنێوان سێ پێوەری ئەمریکی و بەریتانی و ئەروپی پێوەرێکی تایبەت بەخۆمان داڕشتووە.

-    لە ماوەی چوار ساڵدا 15 هەزار لاپەڕەمان وەرگێڕایە سەر زمانی ئینگلیزی. ئەو پێوەرانەی قابیلی جێبەجێکردنن وەرمانگرت و لە هیچ پێوەرێک دەرنەچووین.

-    شەش ڕێبەر بۆ هاونیشتمانیان و پڕۆژەکانە و بەرگی گواستنەوەی ماددە مەترسییدارەکان بۆ پیاوانی بەرگری شارشتانییە.

-    بۆ زەنگی ئاگادار کردنەوە سوودمان لە پێوەری ئەمریکی وەرگرتووە.

-    بۆ سیستمی سەرخەر سوودمان لە ستانداردی ئەوروپی وەرگرت.

-    لە ساڵی 1992 تا ئەو ساڵانە هیچ ستاندارێکمان نەبووە. لە ڕابردوو کە باڵەخانەیەک دروست دەکرا هیچ ستاندارێکمان نەبوو ئێستا ئەو ستاندارە دانراوە.

-    لە کوردستان تانکەر ئاگری گرتووە نەزانراوە چی تێدابووە، لەمەوبەدوا لە ڕێگای کۆدێکەوە کە لەسەر پلێتێکی پرتەقاڵی لەسەر تانکەرەکە دادەنرێت دەزانرێت ئەو تانکەرە چی تێدایە.

-    ئەم ڕێبەرە دەبێتە ئەپڵیکەیشن و لەسەر تابلێتێک لە هەموو بەڕێوەبەرایەتییەک دەبێت.