ژاوەژاو و قەرەباڵغی یانەکانی شەوانە دانیشتووانی عەنکاوە نیگەران دەکەن

ئاڤا نیوز

دانیشتووانی گەڕەکی 189ـی عەنکاوە لە هەولێر، بەدەست ژاوەژاو و قەرەباڵغی بەردەم یانە شەوانەکانی سنوورەکەیان بێزارن و داوا لە لایەنە پەیوەندیدارەکان دەکەن کێشەکانیان بۆ چارەسەر بکەن.

چیرۆکی سەرەکی: گەرەکی 189ـی عەنکاوە لە شاری هەولێر، بەهۆی زۆریی ژمارەی یانەی شەوانە و مەیخانە تێیدا، بەشێک لە هاوڵاتیانی گەڕەکەکە بێزار بوون و داوا دەکەن دابخرێن یان بگوازرێنەوە شوێنێکی دیکە.

 بەشێک لە ماڵەکانی نزیک ئەو یانە شەوانانە تابلۆی "ئەم خانووە بۆ فرۆشتنە"یان هەڵواسیوە، وەک نیشانەیەک بۆ بێزارییان لەو ژاوە ژاو و قەرەباڵغیەی بەردەم یانەکانی شەوانە.

زانیاریی بەدەستهاتوو: دانیشتوویێکی گەڕەکەکە بە ئاڤای ڕاگەیاند "بەیانییەک کاتژمێر 4ـی بەرەبەیان بوو، لە خەو هەستام لەسەر دەنگی ژاوەژاو و هاوار، منیش وتم کچ و کوڕینە کەمێک هەست و شعورتان هەبێت، ئەم خەڵکە خەوتووە و نەخۆشی هەیە و پێویستی بە ئارامییە، بەڵام لە وەڵامدا کچێک هەزار و یەک جنێوی پێدام و زۆر غەمبار بووم، چونکە لە ژیانمدا جنێوم پێ نەدرابوو."

لێدوانی فەرمی: نەبەز عەبدولحەمید، قایمقامی قەزای ناوەندی هەولێر، بە ئاڤای ڕاگەیاند "بەدواداچوون بۆ کێشەی هاووڵاتیانی گەڕەکی 189ـی عەنکاوە دەکەن و لە زووترین کاتدا چارەسەری دەکەن."