هەموو هاووڵاتیەك دەتوانێت بەشداری لە كڕینی موڵكەكانی چاڤی بكات

ئاڤا نیوز

بەڕێوەبەری یاسایی فەرمانگەی هەماهەنگی و بەدواداچوون ڕایدەگەیەنێت، هەموو هاووڵاتیەك دەتوانێت بەشداری لە كڕینی موڵكەكانی كۆمپانیای چاڤی بكات، ئاماژە بەوەش دەكات، بەشێك لە خاوەن پشكەكان ڕەنگە ببنە قوربانی قەرزە كەڵەكەبووەكانی سەر هەردوو كۆمپانیای چاڤی و نالیا.

چیرۆكی سەرەكی: بەپێی ڕاگەیێنراوی وەزارەتی دارایی و ئابووریی هەرێمی کوردستان، ڕۆژی یەکشەممەی داهاتوو 2025-10-05 پڕۆسەی فرۆشتنی موڵکەکانی کۆمپانیای چاڤی بۆ وەبەرهێنانی گەشتیاری لەلایەن بەڕێوەبەرایەتی جێبەجێکردنی دووەمی سلێمانی بەڕێوەدەچێت؛ 60 موڵكی چاڤی لاند بە زیادکردنی ئاشکرا دەفرۆشرێت،  ئامانج لێی؛ گەڕاندنەوەی قەرزەكانی بانكەكانی سەر وەزارەتی داراییە كە بڕەكەی 91 ملیار و 760 ملیۆن و 660 هەزار و 350 دینارە.

لێدوانی فەرمی: پشتیوان عەدنان، بەڕێوەبەری یاسایی فەرمانگەی هەماهەنگی و بەدواداچوون تایبەت بە ئاڤا ڕایگەیاند، بەپێی یاسا هەموو هاووڵاتیەك دەتوانێت موڵكەكان بكڕێت، بەو مەرجەی بڕی 10%ـی نرخی خەملێندراوی موڵكەكە، بە پێشەكی وەك بارمتە لە بەڕێوەبەرایەتیی جێبەجێكردن دابنێت. ئەو كەسەی زیادكردنە ئاشكراكەی بۆ دەردەچێت، لە ماوەی 10 ڕۆژدا دەبێ موڵكەكە لە تۆماری خانووبەرە بخاتە سەر ناوی خۆی، ئەگەر لەماوەی دیاریكراودا ئەو كارەی نەكرد، ئەوا بڕی 10%ـەكەی بۆ ناگەڕێندرێتەوە، هاوكات سەرجەم بەشداربووانی دیكەش كە ناویان لە مەزادەكە دەرناچێت، بڕی بارمتەكەیان دوای فرۆشتنی موڵكەكان بۆ دەگەڕێندرێتەوە.

ئایا خاوەن پشكەكانی پرۆژەی چاڤی لاند قەرەبوو دەكرێنەوە؟

بەپێی یاسا، ئەو كۆمپانیایەی هەڵساوە بە فرۆشتنی پشكەكان، بەرپرسە لە گەڕاندنەوەی مافی خاوەن پشكەكان، چونكە خاوەن پشكەكان سەرەتا مامەڵەیان لەگەڵ ئەودا كردووە، ئەگەرهاتوو كۆمپانیاكە مایەپووچ بوو یاخود قەرزەكانی بەسەردا كەڵەكە ببوو و لەئاست دانەوەی قەرزەكان نەبوو، ئەوا لە پشكی خاوەن پشكەكان دەگێڕدرێتەوە، واتە لەو دۆخەی كۆمپانیای چاڤی، هاووڵاتیانی خاوەن پشك زەرەرمەندن؛ بەو پێیەی ئەگەرهاتوو كەسی قەرزار، لە یەك كاتدا قەرزاری حكومەت و هاووڵاتی بوو، ئەوا قەرزی حكومەت لەپێشترە بۆ دانەوەی.

ئەوەی پێویستە بیزانیت: پێشتر شاسوار عەبدولواحید، خاوەنی هەردوو کۆمپانیای نالیا و چاڤی قەرزێکی زۆری بەناوی وەبەرهێنان لە حکومەتی هەرێمی کوردستان وەرگرتبوو، بڕی قەرزەکان گەیشتووە نزیکەی 92 ملیار دینار، لەسەر سکاڵای وەزارەتی دارایی، دادگا بڕیاری دا دەست بەسەر سەرجەم موڵکەکانی کۆمپانیای چاڤی لاند و نالیا بگیرێت و لە زیاد کردنی ئاشکرا ئەو موڵکانە بفرۆشرێن و قەرزەکانی پێبدرێنەوە