شەقامی سەرەکی کەرکووک بۆ سلێمانی دادەخرێت

ئاڤا نیوز

شەقامی سەرەکی کەرکووک بۆ سلێمانی بۆماوەی یەک ڕۆژ دادەخرێت، لەمبارەیەوە شارەوانیی سلێمانی داوا لە شوفێران دەکات بەپێی نەخشەی دیاریکراو شەقامە جێگرەوەکان بەکاربهێنن.

چیرۆکی سەرەکی: لە چوارچێوەی کارەکانی دروستکردنی یەکتربڕی نوێی تاسڵوجە لە پڕۆژەی شەقامی 100 مه‌تری، ڕۆژی سێشەممە 30-9-2025، شەقامی کەرکووک بە ئاراستەی سلێمانی بەهۆی کارکردن لە دروستکردنی یەکتربڕە نوێیەکە دادەخرێت.

لێدوانی فەرمی: زەردەشت ڕەفیق، وتەبێژی سەرۆکایەتیی شارەوانی سلێمانی بە ئاڤا میدیای ڕاگەیاند: بەهۆی کارکردن لە بەرزەپرد و یەکتربڕی تاسڵوجە لە دەروازەی شاری سلێمانی لە شەقامی کەرکووک بۆ سلێمانی، هەروەها ڕوخاندنی پردە کۆنەکە، شەقامەکە دادەخرێت.

وتەبێژی شارەوانی سلێمانی داوا لە هاووڵاتیان و شوفێران دەکات، دەتوانن شەقامی جێگرەوە بە ئاراستەی 100 مه‌تری بۆ ناو شاری سلێمانی بەکاربهێنن. دەشڵێت، تەنیا لە کاتی ڕوخاندنی پردە کۆنەکە، هاووڵاتیان دەتوانن شەقامی جێگرەوەی (سلێمانی -دوکان-کەرکووک) بەکاربهێنن.

ئاماژە بەوەش دەکات، هاووڵاتیان و شۆفێران بەپێی نەخشەی دیاریکراو شەقامە جێگرەوەکان بەکاربهێنن و لەسەر شەقامەکان ڕێنمایی و هێمای ڕێنیشاندەری پێویست دانراوە.

زانیاریی زیاتر: بەپێی وتەکانی وتەبێژی شارەوانی سلێمانی، شەقامی 100 مەتریی سلێمانی 77%ـی کارەکانی تەواو بووە و لە مانگی 9ـی ساڵی 2026 بە فەرمی بەڕووی شوفێراندا دەکرێتەوە.