پڕۆژەی ئاو گۆپتەپە - چەمچەماڵ لەماوەی کەمتر لە یەک ساڵی دیکە تەواو دەکرێت

ئاڤا نیوز

بەڕێوەبەری ئاو و ئاوەڕۆی هەرێمی کوردستان دەڵێت، کارکردن لە پڕۆژەی ئاوی گۆپتەپە - چەمچەماڵ بەردەوامە و پڕۆژەکە لەماوەی کەمتر لە یەک ساڵ تەواو دەکرێت.

وێنە گەورەکە: یەکێک لە ستراتیژییەکانی کابینەی نۆیەمی حکومەتی هەرێمی کوردستان، چارەسەرکردنی کێشەی کەمئاوی و نەمانی بیرەکانە، بۆ ئەو مەبەستە کۆمەڵێک پڕۆژەی گەورەی ئاو و ئاوەڕۆ لەهەرێمی کوردستان کراون و بەشێکی دیکەش لە قۆناغی جێبەجێکردندان.

لێدوانی فەرمی: ئاری ئەحمەد، بەڕێوەبەری گشتی ئاو و ئاوەڕۆی هەرێمی کوردستان؛ بە ئاڤای گوت، کاکردن لە پڕۆژەی ئاوی گۆپتەپە - چەمچەماڵ بەردەوامی هەیە، ئێستا 20%ـی پڕۆژەکە تەواو بووە، لەماوەی 10 بۆ 12 مانگی دیکە پڕۆژەکە تەواو دەبێت و کۆتایی بە کێشەی کەمئاوی ئەو ناوچەیە دێت.

لەلایەکی دیکەوە: بەڕێوەبەری ئاو و ئاوەڕۆی هەرێمی کوردستان لەبارەی پڕۆژەی ئاوی دووکان - سلێمانی دەڵێت: قۆناغی یەکەمی هێڵی سێیەمی پڕۆژەی ئاوی دووکان - سلێمانی لەماوەی مانگێک جێبەجێ دەکرێت، وێستگەیەکی گەورە و سێ وێستگەی ناوەندی، وەرگرتنی ئاو (ئینتەیک) لەخۆدەگرێت، هەروەها بە 122 کیلۆمەتر بە دوو هێڵی هەزار و 400 ملیمی ئاوەکە دەگوازرێتەوە. هاوکات وێستگەی پاڵاوتنی ئاو لەم پڕۆژەیەدا توانای پاڵاوتنی 20 هەزار مەتر سێجا ئاوی خاوێنی لە کاتژمێرێکدا دەبێت، بەمەش ڕۆژانە نزیکەی 480 هەزار مەتر سێجا ئاو بۆ سنووری پارێزگای سلێمانی دابین دەکات.