ڤاکسینی پەتای وەرزی لە بنکە تەندروستییەکانی سلێمانی بەردەست دەبێت

ئاڤا نیوز

وتەبێژی وەزارەتی تەندروستی حکومەتی هەرێمی کوردستان ڕایدەگەیێنێت، ئێستا ڤاکسینی پەتای وەرزی لەسەرجەم بنکە تەندروستییە سەرەکییەکان بەردەستە.

وێنە گەورەکە: ساڵانە لەسەرەتای وەرزی پایز لەگەڵ گۆڕینی وەرز، وەزارەتی تەندروستی هەرێمی کوردستان بۆ هەموو پارێزگاکان ڤاکسینی پەتای وەرزی دابین دەکات. ئەم ڤاکسینە نیشانەکانی ئەنفلەوەنزای وەرزی کەم دەکاتەوە.

لێدوانی فەرمی: د.سەرکار سورچی، وتەبێژی وەزارەتی تەندروستی حکومەتی هەرێمی کوردستان بە ئاڤای ڕاگەیاند، لە ئێستاوە ڤاکسینی پەتای وەرزی لە بنکە تەندروستییە سەرەکییەکانی هەولێر و دهۆک بەردەستە و لە سلێمانیش هەفتەی داهاتوو بەردەست دەبێت.

د.سەرکار سورچی دەشڵێت، هۆکاری دانانی ئەو ڤاکسینە لە بنکە تەندروستییە سەرەکییەکان ئەوەیە، لەو بنکانە دکتۆری پسپۆڕی لێیە و بە ڕێنوێنی دکتۆر بەکاردەهێنرێت.

لەلایەکی دیکەوە: بەڕێوەبەرایەتی گشتی تەندروستی سلێمانی ڕایگەیاند، لەسەرەتای هەفتەی داهاتووەوە ڤاکسینی پەتای وەرزی لە سەرجەم مەڵبەندە بنکە تەندروستییەکانی سنووری پارێزگای سلێمانی بەردەست دەبێت و دەتوانن سەردانی نزیکترین مەڵبەندو بنکەی تەندروستی لەخۆیانەوە بکەن بۆ بەکارهێنان. ئەم ڤاکسینە کاردەکات بۆ بەرزکردنەوەی ئاستی بەرگری لەشی مرۆڤ. ڕێگری لەتوشبوون بە ڤایرۆسی پەتای وەرزی دەکات و ئەو کەسانەشی دوای کوتانەکە توشی پەتا دەبن بەهۆی کاریگەری ڤاکسینەکەوە لەسەریان ئاسان دەبێت و زووتر تێیدەپەڕێنن.