شاندی وەزارەتی پێشمەرگە و دەستەی خانەنشینی عێراق لە کۆبوونەوەدان

ئاڤا نیوز

شاندی وەزارەتی پێشمەرگە لە بەغدا لەگەڵ دەستەی خانەنشینی عێراق کۆدەبنەوە، بەمەبەستی دیاریکردنی میکانیزمێکی گونجاو بۆ خانەنشینکردنی پێشمەرگە و پلەدارەکانی وەزارەتی پێشمەرگەی هەرێمی کوردستان.

وێنە گەورەکە: وەزارەتی دارایی عێراق داوای کردووە پێشمەرگە بە یاسای خانەنشینی یەکگرتووی ساڵی 2014ـی عێراق خانەنشین بکرێن، بەپێی ئەو  یاسایەش، بڕوانامە و کۆمەڵێک ئیمتیازاتی پێشمەرگە و پلەدارەکان هەژمار ناکرێن و مووچەکانیان کەمدەبێتەوە، حکومەتی کوردستان داوا دەکات بە یاساکانی پەرلەمانی کوردستان خانەنشین بکرێن.

لێدوانی فەرمی: سەرچاوەیەک لە وەزارەتی پێشمەرگە بە ئاڤای ڕاگەیاند: شاندەکە بە سەرپەرشتی حاجی مەلا ئەمین، بەڕێوەبەری گشتیی خانەنشینی پێشمەرگە و بە یاوەری شەش ئەندامی دیکە لەگەڵ دەستەی خانەنشینی کۆدەبنەوە.

ئەوەی پێویستە بیزانیت: بەگشتی نزیکەی 27 هەزار پلەدار و پێشمەرگەی خانەنشینکراو کێشەیان هەیە و چەند مانگێکە مووچەیان وەرنەگرتووە، بەشێکیان ئەوانەن سەرەتای ئەمساڵ خانەنشینکراون، بەشێکیشیان لە مانگەکانی کۆتایی ساڵی 2024 خانەنشین بوونە و هێشتا مووچەیان بۆ نەبەستراوە.