ڕێنووسی پرۆگرامەکانی نوێی خوێندن پسپۆڕانی زمانی کوردی بەسەر دووبەرە دابەش دەکات

ئاڤا نیوز

 

چاپی نوێی ژمارەیەک کتێبی پرۆگرامەکانی خوێندن بە تایبەت بابەتی زمانی کوردی ناڕەزایەتیی ژمارەیەک لە پسپۆڕان و ئەکادیمیستەکانی زمانی کوردی و نووسەرانی لێکەوتووەتەوە.

 

وێنە گەورەکە: ساڵانە وەزارەتی پەروەردە گۆڕانکاری لە ژمارەیەک کتێبی پڕۆگرامەکانی خوێندن دەکات، ئەمەش لە چوارچێوەی پێداچوونەوەی ساڵانە دەبێت. ئەمساڵیش وەزارەتی پەروەردەی هەرێمی کوردستان گۆڕانکاری لە ژمارەیەک کتێبی پرۆگرامەکانی خوێندن کردووە.

 

کاریگەری و لێكەوتەکان: ژمارەیەک لە پسپۆڕان و شارەزایانی زمانی کوردی و نووسەران، وەک ناڕەزایەتی لە بەرامبەر ڕێنووسی زمانی کوردیی پرۆگرامە نوێیەکە، بە ناوی (کۆمەڵێک لە مامۆستایان و دڵسۆزانی زمانی کوردی) نامەیەکی کراوەیان ئاڕاستەی ڕای گشتی و لایەنە پەیوەندیدارەکان کردووە، تیایدا سەرنج و تێبینی و ناڕەزایەتییان لەسەر ڕێنووسەکە دەربڕیوە.

 

زانیاری زیاتر: لە نامە کراوەکەدا هاتووە "بە نیگەرانییەکی قووڵەوە، سەرنجی هەموو لایەکتان بۆ گۆڕانکارییەکی بنەڕەتی لە ڕێنووسی پەرتووکە نوێیەکانی خوێندندا ڕادەکێشین، کە لەلایەن وەزارەتی پەروەردەوە (بەڕێوەبەرایەتیی گشتیی پرۆگرام و چاپەمەنییەکان) ئەنجام دراوە. ئەم گۆڕانکارییانە، بەتایبەتی لادانی بزوێنی درێژی (وو) و گۆڕینی بۆ یەک (و)، هەنگاوێکی مەترسیدارە و زیانێکی ستراتیژی لە بناغەی زمانی ستانداردی کوردی دەدات".

 

بۆچوونی لایەنی بەرامبەر: حەسەن سەرتیپ جاف، بەڕێوەبەری گشتیی پڕۆگرامەكانی خوێندن لە وەزارەتی پەروەردە بە ئاڤا میدیای گوت: بۆ بابەتی زمان و ڕێنووسی کوردی کۆی بابەتەکە لەلایەن 20 پسپۆڕی زمانی کوردی لە سەرجەم پارێزگا و ئیدارە سەربەخۆکان ئامادە کراوە.

 

بە گوتەی حەسەن سەرتیپ، پسپۆڕان و شارەزایانی زمانی کوردی بەسەر دووبەرە دابەش بوون بەشێکیان پێیان وایە بزوێنی (وو) ڕاستە و بەرەکەی دیکە پێیان وایە پێویستە یەک (و) بەکاربێت.

 

چارەسەرەکان: بڕیارە سبەی بەڕێوەبەرایەتیی گشتیی پڕۆگرامەكانی خوێندن ئەم بابەتە بباتە ئەکادیمیای کوردی بۆ ئەوەی بڕیاری لەسەر بدات و یەکلایی بکاتەوە.

 

باکگراوند: بۆ ئەمساڵی خوێندن گۆڕانکاری گەورە لە پرۆگرامەکانی خوێندن کراوە و 142 کتێب چاپکراون.