ڕاگەیێنراوێک لە ئەمریکاوە لەبارەی کشانەوەی هێزەکانی لە عێراق

ئاڤا نیوز

 

وەزارەتی جەنگی ئەمریکا ڕایگەیاند، دوای سەرکەوتن بەسەر داعش و وەک پابەندبوون بە ڕێککەوتنەکەیان لەگەڵ بەغدا، ژمارەی هێزەکانی ئەمریکا و هێزی هاوپەیمانی نێودەوڵەتی دژی داعش لە عێراق کەمدەکەنەوە.

 

ئەوەی پێویستە بیزانیت: واشنتن و بەغدا ڕێککەوتوون لەسەر پلانێک بۆ کشانەوەی هێزەکانی هاوپەیمانێتیی نێودەوڵەتی بە سەرۆکایەتیی ئەمریکا لە عێراق. ڕاپۆرتەکان ئاماژە بەوە دەکەن کە سەدان سەرباز تا کۆتایی ئەمساڵ دەکشێنەوە و ئەوانی دیکەش تا کۆتایی ساڵی 2026.

 

ڕاگەیێنراوی فەرمی: شون بارنیل، وتەبێژی وەزارەتی جەنگی ئەمریکا لە ڕاگەیێنراوێکدا باسی لەوەشكردووە، لە چوارچێوەی ڕاسپاردەی دۆناڵد ترەمپ سەرۆکی وڵات، لیژنەی باڵای سەربازیی ئەمریکا و عێراق و ڕاگەیێنراوی هاوبەشی هەردوو وڵات لە 27ی ئەیلولی 2024، ئەمریکا و هاوپەیمانەکانی لە هێزی هاوپەیمانان ژمارەی سەربازەکانیان لە عێراق کەمدەکەنەوە.

 

ئەوەشی خستووەتەڕوو، کەمکردنەوەی هێزەکانیان ئاماژەی سەرکەوتنە لە ڕووبەڕووبوونەوە دژی ڕێکخراوی داعش و هەوڵێکیشە بۆ گواستنەوەی پەیوەندییەکان بۆ هاوبەشی ئەمنیی بەردەوام لە نێوان عێراق و ئەمریکا، ئەوەش بەجۆرێک دەبێت کە لەگەڵ بەرژەوەندییە نیشتیمانییەکانی ئەمریکا، دەستووری عێراق و ڕێککەوتنی چوارچێوەی ستراتیژیی نێوان ئەمریکا و عێراقدا بگونجێت.

 

وەزارەتی جەنگی ئەمریکا دەشڵێت، پشتیوانیی ئەم هاوبەشییە ئەمنییەی ئەمریکا و عێراق دەکات، کە بەهۆیەوە توانای عێراق بۆ گەشەپێدانی ئابووریی، هێنانی وەبەرهێنانی بیانیی و سەرکردایەتی ناوچەیی لە ئاستی هەرێمییدا باشتر دەکات، حکومەتی ئەمریکاش لە هەماهەنگی پتەو لەگەڵ حکومەتی عێراق و هاوپەیمانی نێودەوڵەتی بەردەوام دەبێت بۆ گواستنەوەیەکی بەرپرسیارانە ئەم پڕۆسەیە.