وەزارەتی پلاندانان بۆ کەم کردنەوەی بێکاری لەگەڵ ڕێکخراوێکی جیهانی سیستمێکی ئەلیکترۆنی دادەمەزرێنێت

ئاڤا نیوز

وەزارەتی پلاندانان بەمەبەستی ئاسانکاری بۆ کەم کردنەوەی ڕێژەی بێکاری و فەراهەمکردنی هەلی کار بۆ دەرچووان، سیستمێک بە هاوکاری ڕێکخراوی کاری جیهانی دادەمەزرێنێت و لەماوەی دوو ساڵدا جێبەجێ دەکرێت.

 

وێنە گەورەکە: لەماوەی ساڵانی 2021 بۆ 2023، ڕێژەی بێکاری %2.5 لە هەرێمی کوردستان دابەزیوە، بەشێوەیەک %16.5 لە 2023 دابەزیوە بۆ %14.5، ئێستا وەزارەتی پلاندانان کار لەسەر ئەوە دەکات کە لەڕێگەی سیستمێک هەنگاوی ئەرێنی بە ئاراستەی کەم کردنەوەی ڕێژەکە بنێت.

 

لێدوانی فەرمی: سیروان محمد، سەرۆکی دەستەی ئاماری ھەرێمی کوردستان؛ بە ئاڤای گوت، "لەڕێگەی چەند ستراتیژییەک کار لەسەر کەمکردنەوەی بێکاری دەکەین، یەکێک لەوانە لەگەڵ یەکێتیی ئەوروپا لەڕێگەی وەزارەتی پلان و وەزارەتی کار ستراتیژی پاراستنی کۆمەڵایەتی پەسەند کرا، بەشێکی ئەو ستراتیژە جێگیرکردنی خوێندنی پیشەییە و لە ناوەندەکانی خوێندن تا 2027 دەبێت جێبەجێ دەکرێت."

 

زانیاریی زیاتر: ستراتیژییەکی دیکەی وەزارەتی پلاندانان، دامەزراندنی سیستمی ئەلیکترۆنی زانیاریی بازاڕی کارە، بەشێوەیەک شێوازی پەرەسەندنی بازاڕی کار لەو سیستمە دیاردەبێت ڕوونی دەکاتەوە لەکوێ بۆشایی هەیە، ئەمەش ئاسانکاری دەکات بۆ کۆکردنەوەی داتا و پڕکردنەوەی بۆشاییەکان.