تورکیا، قەتەر و میسر لەگەڵ حەماس کۆبوونەوە

ئاڤا نیوز

 

کەناڵی (جەزیرە) ئاشکرای دەکات بەرپرسانی قەتەر، میسر و تورکیا کۆبوونەوەیەکیان لەگەڵ شاندی دانوستانکاری حەماس ئەنجام دا بۆ تاوتوێ کردنی پلانی دۆناڵد ترەمپ، سەرۆکی ئەمریکا بۆ کۆتاییهێنان بە جەنگی غەززە.

 

زانیاریی بەدەستهاتوو: کەناڵی جەزیرە لەسەر زاری سەرچاوەیەکەوە بڵاوی کردەوە، بزووتنەوەکە پێش پێشکەشکردنی وەڵامی فەرمی، بە وردی لە پلانەکە دەکۆڵێتەوە. ئاماژەی بەوەشکردووە، شاندی حەماس نێوەندگێرانی ئاگادارکردووەتەوە، "کاردەکات بۆ داڕشتنی هەڵوێستی کۆتایی دوای کۆتاییهێنان بە ڕاوێژکارییەکانی لەگەڵ گرووپە فەڵەستینییەکان."

 

ئاماژەی بەوەشکرد، کۆبوونەوەی بەرپرسانی قەتەر، میسر و تورکیا و شاندی حەماس نوێنەرایەتی بەشێک لە گفتوگۆ تەکنیکییەکان دەکات بۆ داڕشتنی هەڵوێستی کۆتایی لەبارەی پلانەکەی ترەمپ.

 

زانیاریی زیاتر: ئەمە لە کاتێکدایە، ترامپ ماوەی سێ بۆ چوار ڕۆژی بە بزووتنەوەکە دابوو بۆ ئەوەی هەڵوێستی خۆی سەبارەت بە پلانەکەی ڕابگەیێنێت و هۆشداریشی دابوو، ئەگەر ئەو پێشنیازە ڕەت بکاتەوە دۆخەکەیان "زۆر سەخت دەبێت". دووپاتیشی کردەوە کە وڵاتانی ئیسلامی و عەرەبی و ئیسرائیل لەسەر ئەو پلانە ڕازی بوون.

 

ئەوەی پێویستە بیزانیت: ڕۆژی سێشەممە، وەزارەتی دەرەوەی قەتەر ڕایگەیاند، پلانە 20 خاڵەکەی دۆناڵد ترەمپ، سەرۆکی ئەمریکا لەبارەی ئاگربەستی غەززە لەلایەن قەتەر و میسر ڕادەستی حەماس کراوە، چاوەڕێ دەکرێت لە ڕۆژانی داهاتوودا، بزووتنەوەکە هەڵوێستی خۆی لەوبارەیەوە ڕابگەیێنێت.