زیاتر لە 200 دار و 750 گوڵی جۆراوجۆر لە هەولێر دەچێنرێن

ئاڤا نیوز

بۆ زیادکردنی ڕێژەی سەوزایی ناو شاری هەولێر و جوانترکردنی سیمای شەقام و شوێنە گشتییەکان، نزیکەی هەزار دار و گوڵی جۆراوجۆر لە دەوروبەری منارەی چۆلی و نافوورەی شێخی چۆلی دەچێنرێن.

وێنە گەورەکە: یەكێك لە پلانەكانی حكومەتی هەرێمی كوردستان، بە تایبەت لە کابینەی نۆیەمدا، گرنگیدانە بە ژینگە، بەتایبەت زیادكردنی ڕێژەی سەوزایی. لەم چوارچێوەیەدا بەڕێوەبەرایەتیی ئەندازەی پارکەکانی هەولێر بەردەوام هەڵمەتی دار و نەمام چاندن لە شەقام و شوێنە گشتییەکان ئەنجام دەدات.

لێدوانی فەرمی: ڕێبین ئەحمەد، بەڕێوەبەری ئەندازەی پارکەکانی هەولێر بە ئاڤای ڕاگەیاند، ئەمڕۆ چوارشەممە 1-10-2025، لە دوو هەڵمەتی جیاوازدا نزیکەی هەزار دار و گوڵی جۆراوجۆر لە شاری هەولێر چێندران.

دەشڵێت، هەردوو هەڵمەتەکە لەچوارچێوەی هەوڵەکانی حکومەتی هەرێمی کوردستانە بۆ زیادکردنی ڕێژەی سەوزایی لە شاری هەولێر و جوانترکردنی سیمای شەقام و شوێنە گشتییەکان.

ئەوەی پێویستە بیزانیت: لە هەڵمەتی یەکەمدا زیاتر لە 750 گوڵی جۆراوجۆر لە نافوورەی شێخی چۆلی، لەلایەن تیمەکانی ئەندازەی پارکەکان چێندران.

هاوکات، لە هەڵمەتی دووەمیشدا دەستکرا بە چاندنی زیاتر لە 200 دار لە چواردەورەی منارەی چۆلی.

ئەمەش بزانە: هەڵمەتەکان بۆ زیادکردنی ڕێژەی سەوزایی ناو شاری هەولێر بەردەوام دەبن تا کۆتایی وەرزی چاندن.