زانکۆی سەڵاحەددین هەڵگرانی نازناوی مامۆستای یاریدەدەر ئاگادار دەکاتەوە

ئاڤا نیوز

زانکۆی سەڵاحەددین بریارێک بۆ هەڵگرانی نازناوی زانستی (مامۆستای یاریدەدەر) لە زانکۆکەی دەردەکات و بەڕێوەبەری گشتیی فەرمانگەی کارگێڕی و دارایی وەزارەتی خویندنی باڵاش دەڵیت: ڕێکارەکە پەیوەندیی بە ئاستی زانستیی زانکۆکانەوە هەیە.

ڕاگەیێنراوی فەرمی: زانکۆی سەڵاحەددین، ئاگاداری سەرجەم مامۆستایانی زانکۆکەی دەکاتەوە کە هەڵگری نازناوی زانستیی (مامۆستای یاریدەدەر)ـن و ماوەی پێنج ساڵ بەسەر بەدەستهێنانی نازناوی زانستیاندا تێپەریووە، دەبێت لە ماوەی دوو ساڵی داهاتوو نازناوەکانیان بەرز بکەنەوە، ئەگەرنا ڕێکاریی یاساییان بەرانبەر دەگرنەبەر.

لێدوانی فەرمی: د. توانا نەجەف، بەڕێوەبەری گشتیی فەرمانگەی کارگێڕی و دارایی لە وەزارەتی خویندنی باڵا بە ئاڤای گوت : ئەو بریارە پاڵپشتە بە یاسای ژمارەی 10ـی هەموارکراوی ساڵی 2008 کە تایبەتە بە وەزارەتی خوێندنی باڵا، بەپێی یاساکە زانکۆکان دەتوانن ئەو کەسانە بگوازنەوە بۆ سەنتەرەکانی تایبەت بە توێژینەوەی زانستی.

زانیاریی زیاتر: بە گوتەی د. توانا نەجەف، زانکۆکان مافی خۆیانە ئەو هەنگاوە بەرانبەر بەو کەسانە بگرنەبەر، چونکە بەرزنەکردنەوەی نازناوەکانیان کاریگەریی ڕاستەوخۆی لەسەر ئاستی زانستیی زانکۆکان دەبێت.