پەرلەمانی عێراق داوای هەڵوەشاندنەوەی بڕیاری سڕکردنی ناسنامەی کوردانی فەیلی دەکات

ئاڤا نیوز

جێگری سەرۆکی ئەنجوومەنی نوێنەرانی عێراق داوای لە وەزارەتی ناوخۆی حکومەتی فیدراڵ دەکات، کێشەی ئەو کوردە فەیلییانە چارەسەر بکات کە تۆماری باری شارستانی و ناسنامەکانیان سڕ کراوە.

وێنە گەورەکە: دوای دەیان ساڵ لە نەمانی ڕژێمی بەعس، هێشتا کوردانی فەیلی کێشەی ناسنامە و چەندین کێشەی دیکەیان هەیە، تا ئێستا حکومەت هەنگاوی پێویستی نەناوە بۆ چارەسەرکردنیان.

ڕاگەیێنراوی فەرمی: نووسینگەی شاخەوان عەبدوڵڵا، جێگری سەرۆکی پەرلەمان ڕایگەیاند، "بۆ گێڕانەوەی دادپەروەری و مافی ڕاستەقینەی خاوەنەکانیان و لابردنی ستەم، جێگری سەرۆکی پەرلەمان نووسراوێکی بۆ وەزیری ناوخۆ ناردووە. کە تایبەتە بەو کوردە فەیلییانەی کە لە سەردەمی ڕژێمی پێشوودا دوورخراونەتەوە و ئێستاش تۆماری باری شارستانییان لە فەرمانگەکانی خانەقین، مەندەلی و شوێنەکانی دیکە سڕ کراوە، لە کاتێکدا بەپێی یاسا دەبێت ڕەگەزنامەیان پێبدرێتەوە."

لەهەمان کاتدا: شاخەوان عەبدوڵڵا داواشی لە وەزارەتی ناوخۆ کردووە،  بەدواداچوون بۆ دۆسییەکانیان بکات و سڕکردن لەسەر ناسنامەکانیان هەڵبگیرێت. ئامانجی ئەمەش لابردنی ئەو زوڵمەیە کە ماوەیەکی زۆرە لە کوردانی فەیلی کراوە، چونکە بەهۆی کوردبوونیان و هەڵوێستی نیشتمانییانەوە قوربانی زۆریان داوە.

باکگراوند: ڕژێمی بەعس لە 4ـی نیسانی ساڵی 1980، دەستی کرد بە جینۆسایدکردنی کوردانی فەیلی و لە قۆناغی یەکەمدا بە زۆرەملێ بازرگانە فەیلییەکانی دەرکرد لە عێراق و دواتر بە چەند قۆناغێک دەستی کرد بە دەستگیرکردنی کوردانی فەیلی و نزیکەی 20 ھەزار گەنجی کوردی فەیلی بێسەروشوێن کران، ھەڵمەتی ڕژێم دژی کوردانی فەیلی تا ساڵی 1990 درێژەی کێشا و دەست بەسەر ھەموو موڵک و ماڵیاندا گیرا و ناسنامە و ڕەگەزنامەی عێراقییان لێ سەندرایەوە.