ئەنجوومەنی وەزیران: دەمانەوێت هاوشێوەی دۆسیەی نەوت، لە پرسی داهاتە نانەوتییەكانیش ڕێككەوتنی هاوبەش بكرێت

ئاڤا نیوز

ئەمڕۆ چوارشەممە 1ـی ئۆکتۆبەری 2025، بە سەرپەرشتیی سەرۆکوەزیران مەسرور بارزانی و ئامادەبوونی جێگری سەرۆکوەزیران قوباد تاڵەبانی، ئەنجوومەنی وەزیرانی هەرێمی کوردستان کۆبووەوە. و پرسی هەناردەکردنەوەی نەوت و داهاتی نانەوتی تاوتوێ کران.

ڕاگەیێنراوی فەرمی: لە ڕاگەیێنراوێکدا ئەنجوومەنی وەزیران ڕایگەیاند،  لە چەند ڕۆژی ڕابردوو، بە تێکڕا ڕۆژانە 195 هەزار بەرمیل نەوت، لە کێڵگە نەوتییەکانی هەرێمی کوردستان، لەلایەن وەزارەتی سامانە سرووشتییەکانەوە، ڕادەستی کۆمپانیای بەبازاڕکردنی نەوتی سۆمۆ کراوە. داهاتەکەی گەڕاوەتەوە بۆ گەنجینەی فیدڕاڵ

داوا دەکەین حکومەتی فیدراڵیش بەردەوام بێت لەسەر جێبەجێکردنی پابەندیی خەرجکردنی مووچە و شایستەکانی هەرێمی کوردستان بۆ مانگی ئابی ساڵی 2025 و مانگەکانی دیکە، وەک ناوچەکانی دیکەی عێراق.

سەبارەت بە بابەتی بەشی گەنجینەی فیدراڵی، ئەنجوومەنی وەزیران وێڕای دووپاتکردنەوەی پابەندیی حکومەتی هەرێمی کوردستان، بە هاوبەشی پێکردنی داهاتە نانەوتییەکان لەگەڵ وەزارەتی دارایی فیدراڵ.

وەزارەتی دارایی فیدراڵ تا ئێستا هیچ بڕە پارەیەکی بۆ کوردستان خەرج نەکردووە بۆ خەرجییەکانی بەکاربردن و وەبەرهێنان

لەلایەکی دیکەوە: ئەنجوومەنی وەزیران داوا دەکات لە حکومەتی فیدراڵ کە شاندی دانوستانکاری هەردوو حکومەت، لە ژێر سەرپەرشتیی لیژنەی وەزاریی پێکهاتوو بەردەوامی بە کۆبوونەوەکانیان بدەن بۆ گەیشتن بە ڕێكکەوتنێکی هاوبەش تا لە نزیکترین دەرفەتدا، هاوشێوەی دۆسیەی نەوت، دۆسیەی داهاتی نانەوتیش یەکلایی بکرێتەوە و ئیتر هیچ پاساو و بەربەستێک، نەکرێتە بیانوو بۆ کێشەی مووچە.

دوای ڕێککەوتنی سێقۆڵیی هەناردەکردنی نەوتی کوردستان، بارودۆخێکی دارایی نوێ لەگەڵ حکومەتی فیدراڵ هاتووەتە ئاراوە کە پێویست بە پێداچوونەوە و خۆڕێکخستنەوە دەکات.