ئەمساڵ 10 کرێکار لە پڕۆژەکانی نیشتەجێبوونی هەولێر گیانیان لە دەستداوە

ئاڤا نیوز

سەرەڕای هەبوونی یاسا و ڕێنمیاییەکانی دەستبەری کاری کۆمەڵایەتیی و سەلامەتی گیانی کرێکاران، ساڵانە ژمارەیەکی زۆر کرێکار لە پڕۆژەکان بریندار دەبن و  گیان لەدەست دەدەن.

لێدوانی فەرمی: حەسەن ڕەمەزان، وتەبێژی سەندیکای کرێکارانی کوردستان لقی هەولێر، بە ئاڤای ڕاگەیاند، ئێمە کار بە یاسای ژمارە 71ـی ساڵی 1987 دەکەین بۆ پاراستنی مافی کرێکاران لە یاساکە ئاماژە بەوەکراوە دەبێت کرێکار پێش ئەوەی دەست بەکار بکات مەشقی پێ بکرێت لەسەر ئامێرەکان لە مەترسی کارەکە ئاگادار بکرێتەوە، هاوکات ئەرکی خاوەن کارە کە هەموو پێداویستی سەلامەتی و پیشەیی بۆ کرێکار ئامادە بکات و پابەندبێت بە مەرجەکانی سەڵامەتی بۆ کرێکار جێبەجێ بکات.

ژمارەکان وادەڵێن: بەگوتەی حەسەن ڕەمەزان، ئەمساڵ 10 کرێکار لە پڕۆژەکانی شاری هەولێر گیانیان لەدەستداوە، ئەگەر کرێکارێک ناوی تۆمار کرابێت و دەستبەری کۆمەڵایەتیی بۆ کرابێت، ئەوە هەموو مافێکی پێ دەدرێت لەکاتی بریندار بوونی یان گیانلەدەستدانی مافەکان بۆ خانەوادەکەی دەگەڕێندرێتەوە، بەڵام بەداخەوە زۆرجار خاوەن پڕۆژەکان پابەند نابن بە مەرجی سەلامەتی و پیشەیی، کرێکار دەبێتە قوربانی.