ئاڤای خەڵک؛ تەواونەکردنی پڕۆژەیەکی ئاوەڕۆ دانیشتووانی گردجووتیار لە هەولێر نیگەران کردووە

ئاڤا نیوز

بەشێک لە دانیشتووانی گەڕەکی گردجووتیار لە شاری هەولێر، گلەیی و ناڕەزایەتی خۆیان لەبارەی تەواو نەکردنی پڕۆژەی ئاوەڕۆ و کەناڵێکی تایبەت بە لافاو دەردەبڕن، کە بووەتە هۆی دروستبوونی ژینگەیەکی ناتەندروست و مەترسیدار لە گەڕەکەکەیاندا.

زانیاریی بەدەستهاتوو: هاووڵاتیانی گەڕەکی گردجووتیار ئاماژە بەوە دەکەن کە پڕۆژەی ئاوەڕۆکە ماوەیەکی زۆرە جێهێڵدراوە و تەواو نەکراوە، ئەمەش بووەتە هۆی کۆبوونەوەی ئاوی پیس و دروستبوونی بۆن و بەرامێکی ناخۆش. لەلایەکی دیکەوە، کەناڵێکی تایبەت بە لافاو کە بۆ چارەسەرکردنی کێشەی لافاو دروست کراوە، ئێستا خۆی بووەتە کێشەیەکی دیکە، چونکە چاڵی گەورە گەورەی تێدا دروست بووە و مەترسی کەوتنی منداڵانی گەڕەک بۆ ناو چاڵەکان هەیە.

لێدوانی فەرمی: زەردەشت عەبدولخالق، بەڕێوەبەری ئاوەڕۆی هەولێر، بە ئاڤای گوت: "ئاوەڕۆ بۆ گەڕەکەکە دروست دەکەین، نووسراومان بۆ ئەنجوومەنی وەزیران کردووە و ڕەزامەندیشی لەسەر دراوە." ناوبراو گوتیشی: "پڕۆسەکە بە دوو قۆناغ دەکرێت، قۆناغی یەکەم 220 ملیۆن دینار و قۆناغی دووەمیش 420 ملیۆن دینار خەرج دەکرێت."

بەڕێوەبەری ئاوەڕۆی هەولێر ئەوەشی خستەڕوو: "چاوەڕێی ڕەزامەندی وەزارەتی دارایین بۆ دابینکردنی بودجە، بەڵام داواشمان لە پارێزگا کردووە کە لە مانگی یازدەدا لە بودجەی فریاکەوتنی لافاو قۆناغی یەکەم جێبەجێ بکرێت."

لەلایەکی دیکەوە: سەبارەت بە کەناڵەکەی لافاویش، رێبوار کاکەیی، بەڕێوەبەری ئاودێری هەولێر، بە ئاڤای راگەیاند: "پڕۆژەکە 55%ـی تەواو بووە و تەنیا کۆنکریتکردنی ماوە. بەهۆی قەیرانی داراییەوە کارکردن تێیدا وەستاوە و هەر کاتێک پارە دابین کرا، پڕۆژەکە تەواو دەکرێت."