ئاڤای خەڵک؛ باخچەیەکی ساوایان لە هەولێر بەهۆی کۆنی بیناکەی مەترسی لەسەر منداڵان دروست کردووە

ئاڤا نیوز

مامۆستایانی باخچەی ساوانی لاولاو لە شاری هەولێر، کە یەکێکە لە باخچە کۆنەکان و لە ساڵی 1983ـەوە دامەزراوە، هانایان بۆ ئاڤا میدیا هێناوە و گلەیی خۆیان لە دۆخی بینا و خزمەتگوزارییەکانی دەربڕیوە.

زانیاریی بەدەستهاتوو: بەپێی گوتەی مامۆستایان، بینای باخچەکە زۆر کۆنە و ژوورەکانیش زۆر بچووکن، ئەمەش کاریگەری نەرێنی لەسەر پرۆسەی پەروەردە و فێرکردنی منداڵان دروست کردووە. بەڕێوەبەری بوخچەکە ئاماژەی بەوەدا کە زۆربەی کەلوپەل و پێداویستییەکانی ناو پۆلەکان، مامۆستایان بە دڵسۆزی و لەسەر گیرفانی خۆیان کڕیویانە، چونکە بودجەی تەرخانکراو بۆیان زۆر کەمە. ناوبراو گوتی: "لە ساڵێکدا هەموو نەسریەکەمان تەنیا 120 هەزار دینارە."

مامۆستایان نیگەرانی خۆیان لەبارەی دۆخی سەقفی بوخچەکە دەردەبڕن کە لە وەرزی زستاندا رتووبەتی زۆری هەیە. هەروەها، هەندێک سویچ و پلاکی کارەبا مەترسین بۆ سەر منداڵان و زۆر جار شۆرتی کارەبا دروست دەکات. مەتبەخەکەشیان زۆر بچووکە و داوا دەکەن ئاوڕێکی جیدییان لێ بدرێتەوە.

لێدوانی فەرمی: لوقمان سەعید، بەڕێوەبەری گشتی پەروەردەی هەولێر، بە ئاڤای ڕاگەیاند: "پێشتر دەرخستە بۆ نۆژەنکردنەوەی بینای باخچەکە کراوە، بەڵام قەیرانی دارایی هۆکار بووە لەوەی کاری تێدا نەکرێت." ناوبراو گوتیشی: "ئێستاش بەدواداچوون دەکەین و ئەندازیاریش ڕادەسپێرین بۆ ئەوەی پشکنین بکات و دڵنیا بینەوە لەو دەرخستەیەی کە کراوە. چیان پێویست بێت بۆیان دەکەین."