ئەمساڵ لە هەرێمی كوردستان 51 كرێكار لەکاتی کارکردن گیانیان لەدەستداوە

ئاڤا نیوز

ئەمساڵ لە تێكڕای پارێزگا و ئیدارە سەربەخۆكانی هەرێمی كوردستان بە پارێزگای كەركووكەوە، 51 كرێكار لەكاتی كاركردندا گیانیان لەدەستداوە، سەرۆكی لقی سلێمانیی سەندیكای كرێكارانی كوردستان دەڵێت، بەشێك لە خاوەن پڕۆژەکان وەك پێویست پابەندی مەرجی سەلامەتی و پیشەیی نابن.

وێنە گەورەكە: سەرەڕای هەبوونی یاسا و ڕێنمیاییەکانی دەستبەری کۆمەڵایەتیی و سەلامەتیی گیانی کرێکاران، ساڵانە لە هەرێمی كوردستان، ژمارەیەک کرێکار لەكاتى كاركردن لە پڕۆژەکاندا گیان لەدەست دەدەن و بریندار دەبن.

لێدوانی فەرمی: عوسمان زیندانی، سەرۆكی لقی سلێمانیی سەندیکای کرێکارانی كوردستان، تایبەت بە ئاڤا ڕایگەیاند، ئەمساڵ لە سنووری هەردوو پارێزگای سلێمانی و هەڵەبجە، ئیدارە سەربەخۆكانی گەرمیان و ڕاپەڕین، 19 كرێكار لەكاتی كاركردن لە پرۆژەكاندا گیانیان لەدەستداوە. لە پارێزگای دهۆك و ئیدارەی سەربەخۆی زاخۆ 12 كرێكار و لە هەولێر و ئیدارەی سەربەخۆی سۆران 13 كرێكار و لە كەركووك 7 كرێكار، گیانیان لەدەستداوە.

زانیاریی زیاتر: لە كۆی 51 كرێكار كە لە ماوەی نۆ مانگدا گیانیان لەدەستداوە، 11 كرێكاریان بیانین و یەك كرێكاریش ئافرەتە.

هۆكارە زانراوەكان: كەوتنەوە خوارەوە لە شوێنی بڵند، بەركەوتن بە تەزووی كارەبا، خنكان لەناو بیر، داڕمانی دیوار و بنمیچ، تەقینەوە و ئاگركەوتنەوە لەناوچە پیشەسازییەكان و كەوتنی ئامێر بەسەر كرێكاردا، هۆكارە سەرەكییەكانی گیان لەدەستدانن لە كاتی كاركردندا.

ئەوەی پێویستە بیزانیت: ئەگەر کرێکارێک ناوی تۆمار کرا بێت و دەستبەری کۆمەڵایەتیی بۆ کرابێت، ئەوا هەموو مافێکی پێ دەدرێت لەکاتی برینداربوونی، لە حاڵەتی گیانلەدەستدانی، مافەکان بۆ خانەوادەکەی دەگەڕێندرێتەوە.