دەیان ئامێری ATM لە چەند شوێنێكی جیا جیای کوردستان زیاد دەكرێن

ئاڤا نیوز

سەرچاوەیەك لە تیمی هەژماری من بۆ ئاڤا ڕایدەگەیەنێت، لەم مانگەدا ژمارەیەك ئامێری ڕاكێشانی پارە لە چەند شوێنێكی جیا جیای هەرێمی كوردستان دادەنرێت، بەتایبەت لەو شار و شارۆچكانەی كە تا ئێستا لە خزمەتگوزارییەكە بێبەشن.

 

وێنە گەورەكە: لەگەڵ پرۆژەی بەبانكیكردنی مووچەی مووچەخۆرانی هەرێمی كوردستان لە پرۆژەی هەژماری من، سەدان ئامێری (ATM)ـی ڕاكێشانی پارە لە شوێنە گشتییەكان دانراون كە مووچەخۆران لەڕێگەی كارتی بانكییەوە بەئاسانترین شێوە و دوور لە نۆرەگرتنی دوور و درێژی نێو بانكەكان، لەو ئامێرانە مووچەكانیان وەردەگرن.

 

ئەوەی پێویستە بیزانیت: تا ئێستا 580 ئامێری ڕاكێشانی پارە لە 200 شوێن لە سەرتاسەری هەرێمی دانراون و بەپێی ئەو بەرنامەی دانراوە سەدان ئامێری دیكەش دادەنرێن.

 

زانیاریی بەدەستهاتوو: سەرچاوەیەك لە تیمی هەژماری من بە ئاڤای ڕاگەیاند، لە مانگی 10ـدا، دەیان ئامێری دیكەی ڕاكێشانی پارە لە شوێنە جیا جیاكانی هەرێمی كوردستان دادەنرێت، بەپێی پێویستی شوێنەكان و نزیكی شوێنی ئامێرەكە لە شوێنی دەوامكردن و نیشتەجێبوونی مووچەخۆران.

 

پەیوەست بەم بابەتەوە: تەنها ئەمڕۆ و دوێنێ، زیاتر لە 300 هەزار مووچەخۆر لەڕێگای ئەی تی ئێمەكانەوە، زووتر لە وادەی دیاریكراوی خۆی بۆ دابەشكردنی مووچە، مووچەكانیان چووە سەر هەژماری بانكییان و مووچەكانیان وەرگرت و لە ڕۆژانی داهاتووشدا 191 هەزار مووچەخۆری دیكە لەڕێگای هەژماری من مووچەكانیان وەردەگرن.

 

ئێستا زیاتر لە 500 هەزار فەرمانبەر و خانەنشین لەڕێی هەژماری من مووچەكانیان وەردەرگرن، تا ئێستاش زیاتر لە 900 هەزار مووچەخۆر لە پرۆژەكە تۆماركراون و لە ئاییندەیەكی نزیكدا كارتی بانكییان وەردەگرنەوە.