قۆناغی دووەمی پێدانی شوقە بە زیانلێکەوتووانی لافاوەکەی دهۆک دەستپێدەکات

ئاڤا نیوز

 

قەرەبووکردنەوەی زیانلێکەوتووانی لافاوەکەی دهۆک بەردەوامە و بڕیارە ئەمڕۆ ژمارەیەک شوقەی دیکە بە خێزانە زیانلێکەوتووەکان بدرێت.

 

لێدوانی فەرمی: عەبدولعەزیز موحسین بارزانى، بەرپرسی ڕاگەیاندنی مەکتەبی ڕێکخستنی پارتى لە دهۆک بە ئاڤا نیوزی ڕاگەیاند، لە چوارچێوەی قەرەبووکردنەوەی زیانلێکەوتووانی لافاوەکەی دهۆک ئەمڕۆ قۆناغی دووەمی پێدانی شوقە دەستپێدەکات کە 33 شوقەن و بە خێزانە زیانلێکەوتووەکان دەدرێت.

 

زانیاریی زیاتر: ئەو خێزانانەی شوقەیان پێدەدرێت ئەوانەن کە خانووەکانیان کەوتوونەتە سەر ڕووباری هشکەڕووی دهۆک و زیانیان بەرکەوتووە.

 

وێنە گەورەکە: ڕۆژی 19ـی ئەم مانگە لافاوێکی بەهێز سنووری پارێزگای دهۆکی گرتەوە، بەهۆیەوە سێ هاونیشتمانی گیانیان لەدەست دا، زیاتر لە هەزار خانوو و 200 ئۆتۆمبێل زیانیان بەرکەوتووە.

 

ئەوەی پێویستە بیزانیت: هەر دوای لافاوەکە لەسەر بڕیاری سەرۆک بارزانى و سەرۆکوەزیران بارزانی 117 شوقە وەک قۆناغی یەکەم بە خێزانە زیانلێکەوتووەکان درا و ئەمڕۆش 33 شوقەی دیکە پێیان دەدرێت.

 

لەلایەکی دیکەوە: دەستەی وەبەرهێنان لەگەڵ وەبەرهێنەرانی کوردستان لە هەولێر و سلێمانی ملیارێک و 352 ملیۆن دیناری کۆکردووەتەوە بۆ هاوکاری و قەرەبووکردنەوەی هاووڵاتیان لە پارێزگای دهۆک؛ دوێنێ ڕادەستی پارێزگاری دهۆک کرا.