ئاڤای خەڵک؛ نەبوونی ئاوەڕۆی سندووقی لە شارەدێی بۆسکێن دانیشتووان هەراسان دەکات

ئاڤا نیوز

بەشێک لە دانیشتووانی شارەدێی بۆسکێن بەدەست بۆنی ناخۆشی ئاوەڕۆی بەردەم ماڵەکانیان داد و بێدادیانە و چەند ساڵە داوای چارەسەرێک دەکەن بەڵام کەس بە دەنگییانەوە نایەت. 

چیرۆکی سەرەکی: شارەدێی بۆسکێن سەر بە ئیدارەی ڕاپەڕینە و بەهۆی ئەوەی کە ئاوەڕۆی سندووقیان نییە زۆرینەی ئاوی پیسی گەڕەکەکانی شاری ڕانیە بە بەردەم ماڵەکانیانی ئەو شارەدێیە تێپەڕ دەبێت و بۆنی ناخۆش بێزاری کردوون، چەندین ساڵەیشە داوای چارەسەری دەکەن بەڵام ئاوڕیان لێ نەدراوەتەوە. 

لێدوانی فەرمی: مریەم حمەدەمین دانیشتوویەکی ئەم شوێنەیە و بە ئاڤای ڕاگەیاند: کاکە وەڵا هیچ دەسەڵاتێکمان نییە، دەنا یەک ڕۆژ لەم شوێنە نابین، چونکە هەرکات بایەکی بەهێز دێت یان موبەڕیدە پێدەکەین لەبەر بۆن ومێشوولە حاڵمان نییە.

زانیاریی زیاتر: درێژی ئاوەڕۆیەکە هەزار و 79 مەترە و ساڵی 2013 بەبڕی 650 ملیۆن دینار نزیکە 210 مەتری کراوەتە سندووقی و ئەو بەشەی ماوەتەوە و دەکەوێتە ناو ماڵان تەواو نەکراوە. 

لەلایەکی دیکەوە: ڕێباز پیرۆت، بەڕەێوبەری شارەوانییەکانی راپەڕین لەوبارەیەوە دەڵێت: لەبەر کێشەی دانیشتووانی بۆسکێن سەردانی وەزیری شارەوانیم کردوە و بابەتەکەم بۆ ڕوونکردۆتەوە، کە زۆر پێویستە ئاوەڕۆکە بکرێتە سندووقی. وەزیری شارەوانیش ڕەزامەندی زارەکی دەربڕیوە و پێی وتووین هەفتەی داهاتوو دەرخستەی بەشی دووەمی پڕۆژەکە نوێ دەکەینەوە، بۆ ئەوەی لە زووترین کاتدا ڕەزامەندی ئەنجوومەنی وەزیرانی بۆ وەربگرین و دەستی پێبکرێت.

باسی لەوەشكرد؛ ئەو بەشەی ماوە 435 مەترە و نزیکەی ملیارێکی بۆ تەرخان کراوە، پێشووتریش دەرخستەی بۆ کراوە، بەڵام هەڵەیەکی تێدا بووە جارێکی دیکە پێداچوونەوەی بۆ دەکرێت.