گردبوونەوەی خێڵی سوودانی لەبەردەم ماڵی نووسەرێک کاردانەوەی لێدەکەوێتەوە

ئاڤا نیوز

لیژنەی یاسایی پەرلەمان و سیاسەتمەدارانی عێراق وەڵامی گردبوونەوەی عەشیرەتی سوودانی لەبەردەم ماڵی نووسەر و سیاسەتمەدارێکی عێراقی دەدەنەوە.

چیرۆکی سەرەکی: لە چاوپێکەوتنێکی تەلەفزیۆنیدا، غالیب شابەندەر، نووسەر و سیاسەتمەداری عێراقی، ڕایگەیاندبوو، کە باوکی محەممەد شیاع سوودانی، سەرۆکوەزیرانی عێراق لە ڕیزەکانی حیزبی دەعوە نەبووە و سەرەڕای تۆمارکردنی ناویشی لە دەزگای شەھیدان، بەڵام ئەو شەهید نەبووە و لە ڕووداوێکی ھاتووچۆدا گیانی لەدەستداوە، ئەمەش کاردانەوەی خێڵی سوودانی لێکەوتەوە و  بەوهۆیەوە گەمارۆی ماڵەکەیان دا.  

ڕاگەیێنراوی فەرمی: لیژنەی یاسایی پەرلەمانی عێراق، وەک کاردانەوەیەک بەرامبەر بەو گردبوونەوە خێڵەکییە، ڕایگەیاند: گردبوونەوەی خێڵەکی کارێکی تیرۆریستییە و ئامانجی تۆقاندنی هاووڵاتیانە و دوورە لەڕەوشتی شارستانییەوە.

 
زانیاریی زیاتر: ژمارەیەک لە سیاسەتمەدارانی عێراقی بڵاویان کردەوە، ئەو هەڵوێستەی خێڵی سوودانی، زەنگێکی مەترسیداری لادانە لە یاسا و پێیان وایە، عێراق بە کۆبوونەوە و  گردبوونەوەی عەشایەری بوونیاد نانرێت. 

لەلایەکی دیکەوە: ئەم ڕووداوە نیگەرانییەکی زۆری لەسەر ئاستی کۆمەڵایەتی لێکەوتووەتەوە، بەو پێیەی وەک پێشێلکردنی سەروەری یاسا و هەڕەشەیەک بۆ سەر ئازادی ڕادەربڕین سەیر دەکرێت.