لەبارەی وەستانی هەناردەی نەوتی کوردستان ڕوونکردنەوە دەدرێت

ئاڤا نیوز

دوای ئەوەی دەنگۆی وەستانی هەناردەی نەوتی کوردستان بۆ بەندەری جەیهان بڵاوکرایەوە؛ بەرپرسێکی کۆمپانیای نەوتی باکوور ئەو زانیارییانەی ڕەتکردەوە. 

زانیاریی بەدەستهاتوو: بە گوێرەی ڕاپۆرتێکی ئاژانسی ڕۆیتەرز هەناردەی نەوتی هەرێمی کوردستان بۆ بەندەری جەیهانی تورکیا ڕاگیراوە ئەمەش لەبەر ئەوەی تەنکییەکانی گلدانەوەی نەوت پڕبوونەتەوە و شوێنی نەوتی دیکە نەماوە.

زانیاریی زیاتر: بە گوێرەی سەرچاوەیەکی ڕۆیتەرز چاوەڕێ دەکرێت هەناردەکردنەوە کاتژمێر 5ـی ئێوارە، بە کاتی تورکیا، دەستپێبکاتەوە. 


زانیاریی پەیامنێر: دیار محەممەد، پەیامنێری ئاڤا میدیا لەکەرکووک لەگەڵ بەرپرسێکی باڵای کۆمپانیای نەوتی باکوور قسەی کردووە، ئەو بەرپرسە ڕاگرتنی هەناردەکردنی نەوتی هەرێمی کوردستانی ڕەتکردووەتەوە.

باسی لەوە کردوە کە لەڕووی تەکنیکییەوە هیچ کێشەیەک تاوەکو ئێستا ڕووینەداوە و 12 تانکی نەوت کە نزیکەی 10 ملیۆن بەرمیل نەوت دەگرێت لەخاڵی کۆتایی هەرێمی کوردستانە و لە سنووری فیشخاپور جیگیرکراوە کە حەوتیان سەر بەکۆمپانیای نەوتی باکوورە و پێنجیشیان تایبەتە بەکۆمپانیای نەوتی بەسرە.

ئێستا کۆمپانیای سۆمۆ چاوەڕوانی کەشتی دووەمی نەوت هەڵگر دەکات تاوەکو سبەی یەکشەممە بگاتە بەندەری جەیهان و نەوتی کوردستان بگوازێتەوە.