سایلۆی هەولێر چەکی جووتیارانی ئامادەکردووە و ئەم هەفتەیە دابەشی دەکات

ئاڤا نیوز

سایلۆی هەولێر ئاگاداری جووتیارانی سنووری هەولێر دەکاتەوە، ڕۆژی یەکشەممە وەک یەکەم وەجبە، چەکی پارەی گەنمی ئەمساڵ دابەش دەکات، بەڵام سەرەتا تەنیا ئەوانە دەگرێتەوە کە لە 50 تۆن گەنم کەمتریان ڕادەستکردووە.

وێنە گەورەکە: ساڵانە بە دوو ڕێگا گەنمی جووتیارانی هەرێمی کوردستان بە بازاڕ دەکرێت. بەشێکی لەلایەن وەزارەتی بازرگانی عێراق وەردەگیرێت و ئەو بەشەی دەمێنێتەوە لەلایەن چەند کۆمپانیایەکی ناوخۆیی بە بازاڕ دەکرێت.

لێدوانی فەرمی: میران پشدەری، بەڕێوەبەری سایلۆی هەولێر بە ئاڤای وت، ئەمڕۆ هەینی 747 چەکی پارەم واژۆ کردووە و ڕۆژی یەکشەممە 2025-10-05 دابەشی دەکەین و لە زنجیرە یەک تا 150 دەتوانن ئەو ڕۆژە بێن بۆ وەرگرتنی چەک و لە بانکی TBI پارەکانیان وەردەگرن. ئەوەی دەمێنێتەوە لە ئایندە ئاگاداریان دەکەینەوە.

سەبارەت بەوانەی خۆیان ناچن بۆ وەرگرتنی چەکی بانکی، میران پشدەری دەڵێت: ئەو کەسەی چەکی بەناوە پێویستە خۆی ئامادەبێت. ئەگەر بریکارنامەی کردووە پێویستە بریکارنامەکەی پەسەندکراوی ئەمساڵ بێ. ئەگەر خاوەنی چەکەکە کۆچی دوایی کردبێ، پێویستە دابەشنامەی (شرعی یان یاسایی) بهێنێت لەگەڵ بریکارنامەی گشت وارسەکان.

زانیاریی زیاتر: بەڕێوەبەری سایلۆی هەولێر لەبارەی بەشی دووەمی پارەی گەنمی جووتیاران دەڵێت: وەزارەتی بازرگانی پێیان وتین نووسراومان بۆ وەزارەتی دارایی عێراق کردووە و چاوەڕوانین پارەکەی خەرج بکرێت.