تێدێکس نیشتمان لە هەولێر ئەنجام دەدرێت

ئاڤا نیوز

بە دروشمی 'شەپۆلی داهاتوو' سبەی یەکشەممە تێدێکس نیشتمان لە شاری هەولێر دەکرێت، ئەمساڵ چەندین چالاکی جیاواز لەخۆ دەگرێت و گرنگییەکی زۆر دراوە بە بابەتی ژیری دەستکرد. 

وێنە گەورەکە:  زیاتر لە هەشت ساڵە کۆنفرانسی تێدێکس نیشتمان بە بیرۆکە و نوێکاری و بڵاوکردنەوەی بیری هاندەرانە و بوونیادنەرانە لە ڕێگەی کەسانی ئەزمووندار و نوێخواز لە ناوخۆ و دەرەوەی وڵات هانی گەنجان دەدات بۆ داهێنان. 

لێدوانی فەرمی: ڕەوەند حوسێن، ڕێکخەری تێدێکس نیشتمان بە ئاڤا میدیای گوت: چالاکییەکانی ئەمساڵ جیاوازن دروشم و هەموو بڕگەکانیشی بابەتی جیاواز دەبن، بۆ ئەمساڵیش 10 کەس قسەیان دەبێت. 

ڕێکخەری تێدێکس لە بەشێکی قسەکانیدا باسی لەوەشکرد:-

- لەو ژمارە کەسەی سبەی قسەیان دەبێت سێ کەسیان بیانین. 

-  دروشمی ئەمساڵ "شەپۆلی داهاتوو" دەبێت، ئەمەش ئاماژەیە بۆ ئەوەی چووینەتە قۆناغێکی نوێوە. 

- گرنگی زۆردراوە بە بابەتی ژیری دەستکرد و ڕۆبۆت.

- بەهۆی زۆری ژمارەی ئامادەبووانە ئێستا دوو هۆڵ تەرخانکراوە بۆ میوانان. 

گۆشەیەکی دیکەی دیمەنەکە: ئەمساڵ بۆ یەکەمجارە لە کوردستان فاوەندەیشن شوێنێکی لە تێدێکس نیشتمان داناوە بۆ زۆنی داهێنەران، ئەو کەسانەی داهێنەرن لە هەرێمی کوردستان دەتوانن داهێنانەکانیان لەو شوێنە نمایش بکەن و بیانخەنەڕوو.

بە تەنیشت ئەم بابەتەوە: 20 بڕاندی خۆماڵی ئەوانەی تازە دەستیان بە کارکردن کردووە و نمایشی بڕاندەکانیان دەکەن.

ئەمەش بزانە: ئاڤا میدیا سپۆنسەری میدیایی تێدێکس نیشتمانە و بڕگەکانی کۆنفڕانسەکە و بیرۆکەی قسەکەرەکان بۆ بینەران دەگوازێتەوە.

ئەوەی پێویستە بیزانیت: بەشداریکردن لە تێدێکس نیشتمان لە ڕێگەی پڕکردنەوەی فۆرمێکە، دواتر خوازیاران 15 خاڵ هەیە دەبێت کاری لەسەر بکەن بۆ ئەوەی بتوانن هەلی بەشدارکردن لەو کۆنفڕانسە بەدەست بهێنن.

بۆچی گرنگە: پرۆگرامێکە هانی کۆمەڵگا دەدات بەوەی هەر بیرۆکەیەکی نوێ و داهێنان و پێشکەتوو هەبێت و لە کۆنفرانسی سەرەکی تێدێکس باسی لێوەبکرێت و  بۆ کۆمەڵگا بگوازرێتەوە و سوودی لێوەربگیرێت.