بۆ یەکەمجار دوو گەنجی کورد لە قەتەر بەشداریی دیبەتێک دەکەن

ئاڤا نیوز

 

بە پاڵپشتی و سپۆنسەری (کوردستان فاوندەیشن) بۆ یەکەمجار دوو گەنجی هەرێمی کوردستان، بەشداری لە پێشبڕکێی "قەتەر دیبەیت ئۆپن بی پی" دەکەن کە لە دەوحە بەڕێوەدەچێت.

 

وێنە گەورەکە: دیبەیتی قەتەر یەكێكە لە سەرەكیترین پرۆگرامەكانی قەتەر فاوندەیشن بۆ پەروەردە و زانست و گەشەپێدانی کۆمەڵگە. بنکەکەی لە دەوحەی پایتەختی قەتەرە و ناوەندێكی گرنگی گۆڕینەوەی بیروڕایە لە ڕۆژهەڵاتی ناوەڕاستدا، ئامانجی بەهێزکردنی گەنجانە بە لێهاتوویی بیرکردنەوەی ڕەخنەگرانە و گفتوگۆ و قسەکردن لەبەردەم خەڵکدا، لە ڕێگەی پاڵەوانێتیی و ۆرکشۆپ و هاوبەشییەكانەوه، دیبەیتی قەتەر بووەتە ناوەندێک بۆ ئاڵوگۆڕی نێوان کولتوورەکان و پەرەپێدانی سەرکردایەتیی گەنجان لە سەرانسەری جیهاندا.

 

لێدوانی فەرمی: ساکار عەلی، بەڕێوەبەری پەیوەندییە گشتییەکانی کوردستان فاوندەیشن بە ئاڤا میدیای گوت، بۆ یەکەمجاره دوو گەنج لە هەرێمی کوردستانەوه بەشداری لە "پێشبڕکێی قەتەر دیبەیت ئۆپن بی پی" دەکەن، کە لە سێ و چواری مانگی داهاتوو لە دەوحە بەڕێوەدەچێت. ئەم بەشداریكردنە بە پاڵپشتی و سپۆنسەری کوردستان فاوندەیشن ئەنجام دەدرێت، و هەنگاوێكی گەورەیە لە نوێنەرایەتیكردنی تواناكانی گەنجانی كورد لە بۆنە، كۆبوونەوه و پێشبڕكێ جیهانییەكاندا.

 

زانیاریی زیاتر: ئەو دوو گەنجەی هەرێمی کوردستان هەڵبژێردران بۆ بەشداریکردن لە پاڵەوانێتیی دیبەیتی قەتەر، هەریەکە لە ئازیا خالید حەسەنی تەمەن 16 ساڵ لە شاری سلێمانی و یارا هێرش سەعیدی تەمەن 17 ساڵی خەڵکی هەولێرن.

 

لەلایەکی دیکەوە: ئازیا خالید بە ئاڤای وت، لەو کاتەوەی پێمان وترا ئێمە هەڵبژێردراوین بۆ نوێنەرایەتیکردنی کوردستان دیبەیت، دەستمان کرد بە خوێندنەوە، کۆکردنەوەی زانیاری و ڕاهێنان. هەرچی یارا هێرشە دەڵێت: هەرچەندە ئەمە یەکەمین جارمانە بەڵام بە خۆشحاڵییەوە تاوەکو ئێستا ئاستێکی زۆر بەرزمان بەدەستهێناوە و لە کۆتا قۆناغدا بەشداری دەکەین. هاوکات بە ئاڵای کوردستان و جلی کوردییەوە نوێنەرایەتیی خاکەکەمان دەکەین.

 

ئەمەش بزانە: بەشداری ئەم دوو گەنجە لەسەر ئەستۆی کوردستان فاوندەیشنەوه سپۆنسەر دەکرێت، ئەمەش وەك دووپاتكردنەوەی ئەرکی دامەزراوەکە بۆ ڕەخساندنی دەرفەتی جیهانی بۆ گەنجانی کورد و پیشاندانی بەهرە و تواناكانیان لەسەر ئاستی نێودەوڵەتی.

 

بۆچی گرنگە: یەکەم جارە گەنجانی دیبەیتەری کوردستان لە دیبەیتی قەتەر بەشداری  دەکەن و ئەم چالاکییە هەلێكە بۆ گەنجانی کورد لەسەر سەكۆیەكی گرنگی ڕۆژهەڵاتی ناوەڕاست و جیهان بەشداری بکەن، هەنگاوێکی گرنگیشە لە بەهێزکردنی گەنجان، نوێنەرایەتیکردنی گەنجان و ئاڵوگۆڕی کولتووری.

 

ئەوەی پێویستە بیزانیت: کوردستان فاوندهیشن، تۆڕێکی ڕێکخراوی ناحکومیی قازانج نەویستە، بە ئامانجی باشتركردنی کۆمەڵگە و هاوتەریب لەگەڵ بەها بەرز و سەردەمییەكان، كار لەسەر بەهێزکردن و پێشخستنی هەرێمی کوردستان دەکات، هاوشان بە بەشداریی ئەرێنی لە كۆمەڵگەی نێودەوڵەتی كار دەكات لەسەر بنەماكانی نیشتمانی بوون، بونیادنان و پێشكەوتن.