داوا دەکرێت کەرتی گەشتیاری ئاینیی لە عێراق ڕێکبخرێتەوە

ئاڤا نیوز

شارەزایەکی ئابووریی دەڵێت، کەرتی گەشتیاری ئاینیی لە عێراق پێویستی بە ڕێکخستنەوە هەیە، چونکە ساڵانە تەنیا بە وەرگرتنی پارەی ڤیزا هەشت تریلیۆن دینار داهات زیاد دەکات، ئەوەش لە داهاتی پڕۆژەی ڕێگای گەشەپێدان زیاترە.

وێنە گەورەکە: ساڵانە ملیۆنان گەشتیاری ئاینیی سەردانی شوێنە پیرۆزەکانی شیعەکان لە عێراق دەکەن، بەهۆی ڕێکنەخستنەوەی ئەم کەرتە، جگە لەوەی داهاتێکی ئەوتۆ بۆ حکومەتی فیدڕاڵ دەستەبەر ناکات، حکومەت ساڵانە لە یاسای بودجەش پارە بۆ بەڕێوەبردنی ڕێوڕەسمە ئاینییەکان تەرخان دەکات، ئەوەش وەک شارەزایان باسی دەکەن پێویستی بە ڕێکخستنەوە هەیە بەجۆرێک بکرێتە سەرچاوەیەکی داهات لەپاڵ داهاتی نەوت و باج و گومرگ.

لێدوانی فەرمی: نەبیل مەرسوومی، شارەزای ئابووری عێراق لە هەژماری خۆی لە فەیسبووک ڕایگەیاند، عێراق پێویستی بە ڕێکخستنەوەی کەرتی گەشتیاری ئاینیی هەیە، لەوانەش سەپاندنی باج لەسەر ڤیزای هاتنەناوەوەی وڵات بەسەر هەموو گەشتیارێکی عەرەبی و بیانی، وادەکات ساڵانە داهاتی نانەوتی وڵات هەشت ترلیۆن دینار "زیاتر لە شەش ملیار دۆلار" زیاد بکات.

ئەوەشی خستووەتەڕوو، ئەم پارەیەش بە نزیکەیی دوو ئەوەندەی ئەو پارەیەیە کە عێراق بەشێوەی ڕاستەوخۆ لە پڕۆژەی ڕێگای گەشەپێدان دەستی دەکەوێت.