موڵکەکانی چاڤی لاند فرۆشران

ئاڤا نیوز

سەرجەم ئەو موڵکانەی چاڤی لاند کە لەلایەن وەزارەتی دارایی و ئابووریی هەرێـمی کوردستانەوە خرابوونە زیادکردنێکی ئاشکراوە، لەلایەن وەبەرهێنەرێک بە بەهای 91 ملیار دینار کڕدران.

وێنە گەورەکە: شاسوار عەبدولواحید، سەرۆکی جووڵانەوەی نەوەی نوێ خاوەنی هەردوو کۆمپانیای نالیا و چاڤی، لە سەرەتای دامەزراندنی کۆمپانیاکانی قەرزێکی زۆری بەناوی وەبەرهێنان لە حکومەتی هەرێمی کوردستان وەرگرتبوو، بڕی قەرزەکانی گەیشتووەتە نزیکەی 92 ملیار دینار، لە ڕابردوودا وەزارەتی دارایی و ئابووری چەندین جار لە ڕێگەی (بانکی سلێمانی یەک) ئاگاداری کۆمپانیای نالیا و چاڤی کراوەتەوە، بۆ گەڕانەوەی قەرزەکان، بەڵام وەڵامیان نەبووە. لە بەرامبەر ئەو قەرزانە سەرجەم موڵکەکانی کۆمپانیای چاڤی لە زیادکردنی ئاشکرا دەفرۆشرێن. ئەمەش دوای ئەوە دێت کە لە 20-10-2021 دادگا لە بەرژەوەندی وەزارەتی دارایی دۆسیەی قەرزەکانی یەکلایی کردەوە و لە 22-9-2024 گلدانەوە لەسەر سەرجەم موڵکەکانی کۆمپانیای نالیا و کۆمپانیای چاڤی دانرا.

زانیاریی پەیامنێر: چۆمان مەحموود پەیامنێری ئاڤا لەبەردەم بەڕێوەبەرایەتیی جێبەجێکرای سلێمانی ڕایگەیاند: کەمێک پێش ئیستا 60 مۆڵکی چاڤی لاند لە زیادکردنێکی ئاشکرادا فرۆشران. 

زانیاریی زیاتر: ئەو موڵکانەی چاڤی لاند لەلایەن وەزارەتی دارایی و ئابوورییەوە خراوەتە زیادکردنی ئاشکراوە و شەش وەبەرهێنەر ئامادەبوون، سەرجەم موڵکەکان لەلایەن یەک وەبەرهێنەرەوە کڕدراون کە بەهاکەی زیاترە لە 91 ملیار دینار. 

زانیاریی تایبەت: ئاڤا زانیویەتی وەبەرهێنەرەکە ناوی ئاکامە و داوایکردووە زانیاریی لەبارەی سامانەکەی و ئەو کۆمپانیانە ئاشکرا نەکرێت کە ئەو خاوەندارییەتی دەکات.